AMAFOTO: APR FC yegukanye "Super Cup" inyagiye Rayon Sports 4-1

Ikipe y'Ingabo z'u Rwanda, APR FC, yegukanye igikombe kiruta ibindi (Super Cup) gitegurwa n'Ishyirahamwe ry'umupira w'amaguru mu Rwanda (FERWAFA) nyuma yo kunyagira Rayon Sports ibitego 4-1.

Uyu mukino wakiniwe kuri Sitade Amahoro i Remera mu Mujyi wa Kigali ku mugoroba wo kuri uyu wa Gatandatu tariki ya 10 Mutarama (1) 2026, wabimburiwe n'uwo mu kiciro cy'abagore, Rayon Sports yatsinzemo Indahangarwa ibitego 4-0.

Ni ku nshuro ya kabiri yikurikiranya APR FC inyagiriye Rayon Sports ibitego biri hejuru ya 3 kuri Sitade Amahoro ivuguruye, kuko 4-1 byo kuri uyu wa Gatandatu, byaje bisanga 3-0 byo mu mukino ubanza wa Shampiyona wakinwe mu Gushyingo k'Umwaka ushize.

Muri uyu mukino, William Togui yafunguye amazamu rugikubita ku munota wa 19, Ronald Ssekiganda asubyamo.

Nyuma y'uko amakipe yombi avuye mu karuhuko, Dauda Yussif yatsinze icya gatatu, agashinguracumu gatsindwa na Mamadou Sy ku munota wa 90+3.

Mu gihe igitego rukumbi cy'Ikipe ya Rayon Sports cyatsinzwe na Asman Ndikumana.

Uretse kwegukana Igikombe cyari gifitwe na Police FC, APR FC yanahawe Miliyoni 20 z'Amafaranga y'u Rwanda, mu gihe Police yari yagitwaye giherekejwe na Miliyoni 10.

Ku ruhande rw'amakipe y'abagore, ibitego by'Ikipe ya Rayon Sports, byatsinzwe na: Emeline Mukagatete, Odette Coralie Ngwema, Jeanette Ukwikunda na Emerance Niyonshuti.

Mu gihe APR FC yatwaye igikombe cyari gifitwe na Police FC, Rayon Sports y'abagore yakisubije, kuko ari yo yari yanakegukanye Umwaka ushize.

Nayo yashyikirijwe Miliyoni 20 z'Amafaranga y'u Rwanda, mu gihe amakipe yatsindiwe kuri Finale, Indahangarwa WFC na Rayon Sports FC zabonye Miliyoni 10.

Amafoto