Amafoto: Al-Merreikh yasogongeje Kiyovu umurya wo muri Sudani

Ikipe ya Al-Merreikh yo mu gihugu cya Sudani, yaraye itangiye urugendo rwayo muri Shampiyona y'u Rwanda (Rwanda Premier League).

Ni urugendo yatangiriye kuri Sitade yitiriwe Pelé i Nyamirambo mu Mujyi wa Kigali, mu mukino wayihuje na Kiyovu Sports.

Uyu mukino wakinwe ku isaha ya saa 18:00, warangiye Al-Merreikh inyabitse Kiyovu Sports ibitego 2-0.

Ni ku nshuro ya mbere iyi Kipe yo muri Sudani yari ikinnye Shampiyona yo mu Rwanda, nyuma yo kubisaba ikabyemererwa na Ferwafa ndetse n'ubuyobozi bwa Rwanda Premier League, bigahabwa umugisha na CAF.

Uretse Al-Merreikh, Al Hilal SC n'indi kipe yo muri Sudani nayo izakina Shampiyona y'u Rwanda, ikaba izatangira urugendo rwayo kuri uyu wa 26 Ugushyingo (11) 2025, icakirana na Police FC.

Ibitego byabonetse muri uyu mukino, byinjiye mu gice cya kabiri, cyane ko amakipe yombi yakinnye igice cya mbere acungana ku jisho.

Nyuma y'uko amakipe avuye mu karuhuko k'iminota 15, Daouda Ba wa Al-Merreikh yafunguye amazamu ku munota wa 68, mu gihe Mohammed Teya Abudegen yatsinze icy'agashinguracumu ku munota wa 87.

Kuri uyu wa Kane tariki ya 27 Ugushyingo (11) 2025, Al-Merreikh itozwa na Darko Novic wanyuze mu Rwanda atoza Ikipe ya APR FC, iragaruka mu kibuga icakirana n'Ikipe ya Bugesera FC.

Mu gihe Al-Merreikh igaruka mu kibuga kuri uyu wa 27 Ugushyingo (11) 2025, Kiyovu Sports izakigarukamo ku wa Gatanu tariki ya 28 Ugushyingo (11) 2025, yesurana na Gorilla FC.

Amafoto