Al Merrikh SC yo muri Sudani nayo yasabye gukina Shampiyona y'u Rwanda

Ikipe ya Al-Merrikh Sporting Club yo mu gihugu cya Sudani, yasabye gukina Shampiyona y'ikiciro cya mbere cy'umupira w'amaguru mu Rwanda.

Iyi kipe y'ubukombe butisukirwa muri Sudani, ije yiyunga kuri Al Hilal na Al-ahli Wadi Madani, zabisabye mu minsi ishize.

Amakuru THEUPDATE ifite, n'uko Al Hilal na Al-ahli Wadi Madani zamaze no kubyemererwa, ndetse ntagihindutse zikaba zizatangira gukina guhera ku munsi wa gatanu wa Shampiyona.

Al-Merrikh Sporting Club, izanzwe itozwa na Darko Novic, wanyuze mu Ikipe ya APR FC yo mu Rwanda, mu myaka ishize.

Mu gihe yaramuka yemerewe, amakipe agize Shampiyona y'u Rwanda, yava kuri 16, akagera kuri 19.

Mbere yo kwandika isaba kuza gukinira i Kigali, Al-Merrikh Sporting Club yakinaga muri Shampiyona y'Igihugu cya Mauritania.

Twibutse ko mu gihugu cya Sudani, guhera mu 2023 nta Shampiyona ikinwa, bitewe n'Intambara twagarutseho haruguru.

Al-Merrikh Sporting Club, ubusanzwe ifite igicumbi (Ikicaro) mu Mujyi wa Omdurman ho muri Sudani.

N'imwe mu makipe amaze igihe kirekire ashinzwe ku Mugabane w'Afurika, kuko yashinzwe mu Mwaka w'i 1908.

Mu Myaka 117 imaze ishinzwe, yegukanyemo Shampiyona 19, Ibikombe by'Igihugu 19 ndetse inegukana Shampiyona ya Khartoum League inshuro 17.

Ku ruhando mpuzamahanga, yegukanye Igikombe cy'amakipe yatwaye ibikombe iwayo (African Cup Winners' Cup) inshuro 1 mu (1989), inatsindirwa ku mukino wa nyuma wa CAF Confederation Cup mu 2007.

Mu karere, yegukanye Ibikombe 3 bya CECAFA mu nshuro 8 yitabiriye iyi mikino.

Igikombe cya mbere yagitwaye mu 1986, yongera kugitwara mu 1994, mu gihe icya nyuma igiheruka mu 2014.

Al-Merrikh Sporting Club ifite ibigwi n'ibirindiro muri Afurika, kuko imaze gukina imikino ya CAF Champions League inshuro 30.

Imaze gukina kandi imikino ya CAF Confederations Cup inshuro 8, mu gihe iya African Cup Winners' Cup yayikinnye inshuro 11.

Yitabiriye kandi imikino ya Champions League ihuza Ibihugu byo mu Barabu, iyikina inshuro 12.

Abakunzi b'umupira w'amaguru bakunze kuvuga ko mu Rwanda haba amakipe abiri gusa (APR FC na Rayon Sports), ariyo akunze gusimburana ku bikombe bikinirwa imbere mu gihugu, ibi bikaba biyabeshya ko akomeye, nyamara yagera ku ruhando mpuzamahanga, agasezererwa atarenze umutaru.

Bityo, aya makipe yo muri Sudani, akaba ari igipimo nyacyo, cyane ko ku kijyanye n'amikoro, atajenjetse.

Al Merrikh SC imaze Imyaka 117 ikina ruhago, yasabye gukina Shampiyona y'u Rwanda.