Twiyibutse: APR FC na Al Merrikh SC mu bihe byashize, mbere y’uko rwambikana muri Shampiyona

Kuri iki Cyumweru tariki ya 18 Mutarama (1) 2026, rurambikana hagati y'Ikipe y'Ingabo z'u Rwanda, APR FC, ndetse n'Ikipe ya Al Merrikh SC yo mu gihugu cya Sudani.

Umukino ugiye guhuza izi mpande zombi, n'uwa Shampiyona y'ikiciro cya mbere mu Rwanda, nyuma y'uko Al Merrikh SC yemewe kuza gukinira i Kigali, bitewe n'Intambara ikomeje kuyogoza Sudani guhera mu 2023.

Ikipe ya APR FC iri ku mwanya wa 3 muri Shampiyona n'amanota 32, mu mikino 15 imaze gukina.

Ikurikiwe na Al Merrikh SC iri ku mwanya wa 4 n'amanota 30 mu mikino 14 yakinnye.

Ni mu gihe umwanya wa mbere wicaweho n'Ikipe ya Polisi y'u Rwanda, Police FC, ifite amanota 34 mu mikino 17.

Uyu mukino w'ibi bikonyozi, abakunzi ba APR FC bawufashe nko nk'uwo kwishyura umwenda umaze imyaka irenga 10.

Mu mwaka w'i 2012, APR FC yahinduye uburyo yari isanzwe iguramo abakinnyi, ihitamo gukoresha abakinnyi b'Abanyarwanda gusa. 

Nyuma y'Imyaka 2 gusa ihinduye uburyo yaguramo abakinnyi, APR FC yacakiranye na Al Merrikh SC ku mukino wa nyuma w'Irushanwa rya CECAFA Kagame Cup wakiniwe muri Sitade Amahoro, imbere ya Perezida wa Repubulika y'u Rwanda, Kagame Paul.

Bitandukanye n'ibyo abakunzi ba APR FC bibwiraga, Al Merrikh SC yabatwaye iki gikombe, ku gitego rukumbi cyatsinzwe n'Umunyakenya, Allan Wanga, mu izamu ryari ririnzwe na Kwizera Olivier, kuri ubu ukinira Ikipe ya Rayon Sports.

Uyu mukino wa nyuma wa CECAFA, niwo rukumbi wari warahuje aya makipe yombi, mbere y'uko yisobanura kuri iki Cyumweru, ku nshuro ya kabiri mu mateka yayo.

Ikindi gikomeza uyu mukino, n'uko Al Merrikh SC itozwa kuri ubu n'Umunya-Serbia, Darko Nović, weretse umuryango na APR FC mu bihe byashize, nyuma yo kutishimira umusaruro yayihaye.

Kuri Darko Nović, bizafatwa nko kwihimura kwiza mu gihe yaramuka itsinze uyu mukino, naho APR FC ikazaba ishaka gushimangira ko itari yamwibeshyeho n'ubundi atari ku rwego rw'abatoza yifuza.

Ni umukino uzakinirwa kuri Sitade Amahoro i Remera mu Mujyi wa Kigali, ku isaha ya saa 15:00.

Amafoto