Rwanda: Gukora Ballon yahariwe Imikino ya Shampiyona bigeze kuri 60%

Mu gihe Umupira w'amaguru ukomeje kuba kimwe mu bicuruzwa bikomeye mu bukungu bw'Isi n'ubw'Ibihugu muri rusange, u Rwanda narwo rurakataje.

Kimwe mu bintu bafata umwanya munini w'abakunzi ba Siporo, Umupira w'amaguru uza mu bya mbere by'umwihariko Shampiyona y'Igihugu y'ikiciro cya mbere, n'ubwo umusaruro itanga ku ruhando mpuzamahanga ukomeza gukemangwa uko bwije n'uko bukeye.

N'ubwo umusaruro amakipe aserukira Igihugu abona, utandukanye n'uwo abafana baba bayitezeho, ibikorwa byo gusukura uyu mukino wihebewe n'abatari bacye, birarimbanyije.

Kuri iyi nshuro, Rwanda Premier League Board, Ikigo kigenga gishinzwe gutegura Shampiyona y'u Rwanda, cyatangaje ko Umushinga wo gutegura Umupira [Ballon] yahariwe gusa gukinwa muri Shampiyona, bigeze kure.

Amakuru THEUPDATE ikesha abegereye ubuyobozi bwa Rwanda Premier League, avuga ko uyu mushinga, ushobora kuba ugeze ku kigero cya 60%.

Aya makuru, akomeza avuga ko, nyuma y'uko iyi Mipira izaba imaze kugezwa ku Isoko, izahabwa amakipe yose uko ari 16 akina Shampiyona y'ikiciro cya mbere, kandi bikazakorwa nta kiguzi.

Uretse amakipe yo mu kiciro cya mbere, aya makuru THEUPDATE yabonye, avuga ko mu gihe Umushinga watanga umusaruro, n'amakipe akina muri Shampiyona y'ikiciro cya kabiri, nayo ashobora guhabwa kuri iyi Mipira, muri Shampiyona y'Umwaka utaha [2026-27].

Umushinga w'Umupira wo gukina wihariye, uje usanga indi itandukanye iri gukorwa na Rwanda Premier League, irimo nko; Guhemba umukinnyi wahize abandi muri buri mukino, umukinnyi n'umutoza b'Ukwezi ndetse n'ibindi.

Ibi byose, ubuyobozi bwa Rwanda Premier League, buvuga ko bikorwa hagamijwe ko Shampiyona y'u Rwanda iba kimwe mu bicuruzwa bikurura abaterankunga ndetse bikarushaho gutunga ababibamo.

Twibutse ko, Shampiyona y'u Rwanda y'Umwaka w'i 202526, igeze ku munsi wayo wa 3, ikaba iyobowe n'Ikipe ya Polisi y'Igihugu, Police FC, n'amanota 9/9, mu gihe Rutsiro na AS Muhanga ziheruka izindi n'ubusa bw'amanota.