Rae Yvonne yafashije Kepler gutsinda REG mu mukino wa 1 w'iya Finale

Ikipe ya Kaminuza ya Kepler, Kepler WBBC yaraye itsinze iy'Ikigo cy'Igihugu cy'Ingufu, REG, REG WBBC mu mikino wa mbere w'iyo guhatanira Igikombe cya Shampiyona y'Umwaka w'i 2024-25.

Uyu mukino wakiniwe muri Petit Sitade Amahoro, warangiye Kepler iwutsinze ku ntsinzi y'amanota 65 kuri 62.

Muri aya manota 65 yatsinzwe n'abakinnyi ba Kepler WBBC, 17 yatsinzwe n'Umunyamerikakazi, Young Desi-Rae Yvonne.

Umukino waraye uhuje aya makipe yombi, n'umwe muri 7 iteganyijwe gukinwa.

Ikipe izatwara Igikombe, bizayisaba gutsinda byibuze imikino 4 muri 7.

Uretse kwegukana Igikombe, Ikipe izagitwara bizayihesha amahirwe yo guhagararira u Rwanda mu mikino y'Akarere ka Gatanu, Zone V.

Imikino 10 y'agace ka mbere k'uyu mukino wari injyanamuntu, karangiye REG WBBC ikegukanye n'amanota 21 kuri 17.

Ikipe ya Kepler WBBC yaje kwikubita agashyi inzira zikigendwa, yegukana agace ka kabiri n'amanota 17 kuri 12, amakipe yombi ajya mu karuhuko k'iminota 15, Kepler WBBC iyoboye n'amanota 34 kuri 33 ya REG WBBC.

Nyuma y'uko amakipe yombi avuye kuruhuka, Ikipe ya Kepler WBBC yagarutse iri hejuru, bihita biyifasha kwegukana agace ka gatatu n'amanota 12 ku 08 ya REG WBBC.

Imaze kwandagazwa muri aka gace, REG WBBC yaje mu gace ka kane ikina byo gupfa no gukira, ikegukana ku ntsinzi y'amanota 21 kuri 19.

Gusa, aya manota ntabwo yari ahagije ngo yegukana umukino, nyuma yo kurushwa bigaragara mu gace ka gatatu.

Amanota 17 yatsinzwe na Desi-Rae Yvonne agafasha Kepler WBBC kwegukana umukino, yunganiwe na 16 yatsinzwe na Nelly Sandra Nsanzabaganwa, na 14 yatsinzwe na Traore Aichata.

Ku ruhande rwa REG WBBC, Akon Rose Paul Macuei niwe mukinnyi wayitsindiye amanota menshi, 12. Yunganiwe na Maiga Kadidia watsinze 11.

Umukino wa kabiri hagati y'aya makipe yombi, uteganyijwe kuri uyu wa Gatanu tariki ya 22 Kanama [8] 2025.

Amafoto

Desi Rae Yvonne yatsinze amanota 17 yafashije Kepler WBBC guhigika REG WBBC.