RBC yiganje mu makipe azakina imikino ya nyuma muri Shampiyona y'abakozi

Ikigo cy’Igihugu cy'Ubuzima (RBC) kiri mu bifite amakipe menshi yageze kuri finale ya Shampiyona ihuza abakozi.

Iyi mikino iteganyijwe gusozwa kuri uyu wa Gatandatu tariki ya 14 Gashyantare (2) 2026.

Iki kigo cyageze kuri finale muri Volleyball, Basketball ndetse n’umupira w’amaguru.

Muri Volleyball, RBC izahura n’Ikipe y’Ikigo cy’Igihugu gishinzwe Imisoro (RRA) mu kiciro cy’abagore.

Umukino uzahuza aya makipe yombi, uzakinirwa muri Cercle Sportif de Kigali (CSK) guhera saa 09:00 za mugitondo.

Mu mupira w’amaguru mu kiciro cy’abagabo, RBC izacakirana n’Ikipe y’Ikigo cy’Igihugu gishinzwe abanjira n’abasohoka (DGIE), mu mukino uzakinirwa kuri Sitade yitiriwe Pele i Nyamirambo, guhera ku isaha ya saa 11:00.

Mu gihe muri Basketball mu kiciro cy’abagore, RBC izisobanura n’Ikipe y’Ibitaro bya Kaminuza bya Butare (CHUB), mu mukino uzakinirwa muri Cercle Sportif de Kigali (CSK) guhera ku isaha ya saa 11:00.

Mu yindi mikino ya nyuma iteganyijwe, Ikipe y’Ikigo cy’Igihugu cy’ibarurishamibare (NISR), izesurana n’Ikipe y’Ikigo cy’Igihugu gishinzwe abanjira n’abasohoka (DGIE), mu mukino wa Volleyball wa Category A mu bagabo, uzakinirwa muri Petit Stade Amahoro i Remera guhera saa 11:00.

Mbere yaho gato, muri Category B, Ikipe ya Minisiteri y’Ubuzima (HoM), izaba yabanje kwisobanura n’Ikipe y’Ikigo cy’Igihugu gishinzwe gucunga Ibibuga by’Indege (RAC), guhera saa 09:00.

Muri Basketball kandi, Ikipe ya GASABO 3D izakina na n’Ikipe y’Ikigo cy’Igihugu gishinzwe gucunga Ibibuga by’Indege (RAC) muri Category B mu bagabo, mu mukino uzakinirwa kuri Zaria Court guhera ku isaha ya saa 10:00.

Mu mupira w’amaguru muri category B mu bagabo, hari umukino uzahuza Ikipe ya Banki y’Iguhugu itsura Amajyambere (BRD) izesurana n’Ikipe n’Ikipe y’Ikigo cy’Igihugu gishinzwe gucunga Ibibuga by’Indege (RAC), mu mukino uzakinirwa kuri Tapis Rouge i Nyamirambo kuri uyu wa 13 Gashyantare (2) 2026 ku isaha ya saa 15:30.

Mu mupira w’amaguru n’ubundi kiciro cy’abikorera, Ikipe ya Kaminuza ya Global Health Equity (UGHE), izahura n’iy’Uruganda rwenga Inzoga zisembuye n’izidasembuye rwa SKOL, mu mukino uzakinirwa kuri Sitade yitiriwe Pele i Nyamirambo, guhera ku isaha ya saa 09:00.

Mbere y’uko hakinwa imikino ya nyuma, mu mpera z’Icyumweru gishize hakinwe iyo guhatanira umwanya wa gatatu.

Mu mupira w’amaguru mu makipe yo muri Category A, Ikipe ya NISR yatsinze ibitego 3-0 Ikipe ya MINECOFIN, mu gihe muri Category B, Ikipe ya WASAC yatsinze RISA kuri penaliti 5-3 nyuma yo kugwa miswi y’igitego 1-1.

Muri Basketball mu makipe yo muri Category A, Ikipe ya Minisiteri y’Ingabo (MoD), yatsinzwe n’iya RWANDAIR amanota 75 kutri 58, mu gihe muri Category B, Ikipe y’Ibitaro bya Kaminuza bya Butare (CHUB) yatsinze CCI amanota 57 kuri 51.

Muri Volleyball mu makipe yo muri Category A, Ikipe ya RWANDAIR yatsinze iya Minisiteri y’Ingabo (MoD) amaseti 3-0, mu gihe muri Category B, Ikipe y’Ikigo cy’Igihugu gishinzwe Imisoro (RRA) yatsinze NILA amaseti 3-0.

Iyi mikino ihuza abakozi yatangiye gukinwa mu 1999 yitwa ASCOKI, iza guhindurirwa izina yitwa ARPST hagamijwe kuyijyanisha n’igihe.

Ikinwa buri mwaka guhera mu Kwezi kwa Nyakanga (7), ikaba yitabirwa n’abakozi bo mu Bigo bitandukanye yaba iby’abikorera n’ibya Leta, hagamijwe gusabana no kumenya, ndetse no kubafasha gukora Siporo no kwidagadura, cyane ko igihe kinini cyabo bakimara mu kazi.

Nyuma y’imikino ya nyuma, amakipe yegukanye ibikombe azabashyikirizwa mu birori bizabera muri Sitade yitiriwe Pele i Nyamirambo.