Isak, Mbeumo, Gyökeres: Uko amakipe yo mu Bwongereza yakoresheje arenga Miliyari 3£ yiyubaka

THEUPDATE

Sep 2, 2025 - 11:47

Isak, Mbeumo, Gyökeres: Uko amakipe yo mu Bwongereza yakoresheje arenga Miliyari 3£ yiyubaka

Mu ijoro ryakeye, haraye yashyizwe akadomo ku Mezi arenga abiri y'isoko ry'igura n'igurisha ry'abakinnyi muri Shampiyona y'Ubwongereza izwi nka English Premier League.

Muri iki gihe cy'iminsi 60 gusa, Amakipe 20 azakina Shampiyona y'Umwaka w'i 2025-26, yakoresheje Amapawundi arenga Miliyaridi eshatu.

Bamwe mu bakinnyi bisinyishijwe barimo; Rutahizamu w'Umunyasuwede, Alexander Isak waguzwe na Liverpool ku munsi wa nyuma, atanzweho Miliyoni 125 z'Amapawundi.

Yahise anaca agahigo ko kuba Umukinnyi uhenze mu mateka ya Shampiyona y'ubwongereza.

Nyuma y'uko iri soko rifuzwe imiryango kugeza muri Mutarama y'i 2026, THEUPDATE yabateguriye inkuru igaruka ku buryo amakipe yaryitwayeho.

Mbere y'uko iri soko rifunga ku ya 01 Nzeri [9] 2025, Ukwezi kwa Kanama [8] 2025, kwasojwe amakipe amaze kurekura Miliyari 2 na Miliyoni 730 z'Amapawundi.

Mu ijoro ryakeye nyuma y'uko Liverpool iguze Isak, aya Mapawundi yahise agera kuri Miliyari 3 na Miliyoni 87 z'Amapawundi.

Aya Mapawundi yatanzwe muri iyi Mpeshyi, akubwe hafi gatatu ayari yatanzwe mu Mpeshyi y'Umwaka ushize, kuko hari hakoreshejwe Miliyari 1 na Miliyoni 960, mu gihe mu Mpeshyi y'i 2023, hari hakoreshejwe Miliyari 2 na Miliyoni 360.

Amapawundi yakoreshejwe muri Shampiyona y'Ubwongereza agura abakinnyi muri iyi Mpeshyi, aruta ayakoreshejwe n'amakipe yo muri Shampiyona y'Ubudage, Esipanye, Ubufaransa n'Ubutaliyani uziteranyije.

Abakinnyi bahinduye amakipe ku munsi wa nyuma

Umunsi wa nyuma waraye ushyizweho akadomo ku Isaha ya saa 19:00 zo mu Bwongereza, saa 20:00 za Kigali.

Rutahizamu w'Umunyasuwede, Alexander Isak, niwe mukinnyi wari uhanzwe amaso n'abatari bacye.

Yerekeje muri Liverpool ku Isaha ya saa 22:30 za Kigali, aguzwe muri Newcastle United.

Liverpool yifuzaga kumugurana na Myugariro wa Crystal Palace, Marc Guehi, byanga ku munota wa nyuma.

Mu gihe Isak yerekezaga muri Liverpool, yabisikanye n'Umukongomani, Yoane Wissa, wakiniraga Ikipe ya Brentford, watanzweho Miliyoni 55 z'Amapawundi.

Ikipe ya Fulham nayo ntiyatanzwe, kuko yibitseho Umunya-Brazil, Kevin Santos Lopes de Macedo, imukuye muri Shakhtar Donetsk yo muri Ukraine, imutanzeho Miliyoni 34 z'Amapawundi.

Manchester United nayo yaremye isoko ryo ku munsi wa nyuma, igura Senne Lammens, Umunyezamu w'Umubiligi, imukuye mu Ikipe ya Royal Antwerp. Yamutanzemo Miliyoni 18 n'Ibihumbi 100 by'Amapawundi.

Lammens yabisikanye na Jadon Sancho na Victor Jörgen Nilsson Lindelöf bombi berekeje muri Aston Villa. Iyi kipe kandi, yasinyishije Harvey Elliott imutiye muri Liverpoll.

Tottenham Hotspur ntiyatanzwe kuri iri soko, kuko yasinyishije rutahizamu w'Umufaransa, Randal Kolo Muani, imutiye mu Ikipe ya Paris Saint Germain.

Mu gihe Tottenham yasinyishaga Kolo Muani, mukeba wayo w'i London/Londre, Arsenal ntabwo yatereye agati mu Ryinyo, kuko nayo yasinyishije Piero Hincapie, imutiye mu Ikipe ya Bayer Leverkusen.

Nyuma yo kugaruka mu kiciro cya mbere, Ikipe ya Sunderland nayo yaremye Isoko ryo ku munsi wa nyuma, isinyisha Brian Brobbey na Bertrand Traore ibakuye mu Ikipe ya Ajax yo mu Buholandi, ibongeraho Lutsharel Geertruida yatijwe na RB Leipzig.

Ikipe ya Manchester City ntiyatanzwe, kuko yasinyije Umunyezamu w'Ikipe y'Igihugu y'Ubutaliyani, Gianluigi Donnarumma, imukuye mu Ikipe ya Paris Saint Germain.

Uko amakipe akurikirana mu kurekura akayabo kuri iri Soko

Ikipe ya Liverpool niyo yarekuye Amapawundi mesnhi, kuko yatanze Miliyoni 415 ku bakinnyi 10.

Yakuyeho agahigo k'Ikipe ya Chelsea, yari yatanze Miliyoni 400 z'Amapawundi mu 2023.

Abakinnyi baguzwe na Liverpool: Hugo Ekitike [Eintracht Frankfurt] Jeremie Frimpong [Bayer Leverkusen], Alexander Isak [Newcastle United], Milos Kerkez [Bournemouth], Giorgi Mamardashvili [Valencia], Armin Pécsi [Puskás Akadémia], Florian Wirtz [Bayer Leverkusen], Freddie Woodman, Will Wright [Salford City] na Giovanni Leoni [Parma].

Kuri iri Soko, Liverpool yakurikwe na Chelsea na Arsenal, zarekuye Amapawundi Miliyoni 285 kuri Chelsea na 255 kuri Arsenal.

N'ubwo yarekuye aya Mapawundi, Chelsea yagurije abakinnyi bayinjirije Miliyoni 288 z'Amapawundi. Bivuze ko yungutse Miliyoni 3.

Mu gihe Chelsea yunguka, Arsenal yashoye Miliyoni 255, yakusanyije Miliyoni 9 gusa mu bakinnyi yagurishije. Bivuze ko yarekuye Miliyoni 246.

Abakinnyi baguzwe na Arsenal: Kepa Arrizabalaga [Chelsea], Martin Zubimendi [Real Sociedad], Christian Nørgaard [Brentford], Noni Madueke [Chelsea], Cristhian Mosquera [Valencia], Viktor Gyökeres [Sporting CP] na Eberechi Eze [Crystal Palace].

Abakinnyi baguzwe na Chelsea: Mike Penders [Genk], Dário Essugo [Sporting CP], Liam Delap [Ipswich Town], Mamadou Sarr [Strasbourg], Kendry Páez [Independiente del Valle], João Pedro [Brighton & Hove Albion], Jamie Gittens [Borussia Dortmund], Jorrel Hato [Ajax], Estevao [Palmeiras] na Alejandro Garnacho [Manchester United].

Abakinnyi baguzwe na Manchester United: Matheus Cunha [Wolverhampton Wanderers], Diego León [Cerro Porteño], Enzo Kana‑Biyik [Le Havre], Bryan Mbeumo [Brentford], Benjamin Šeško [RB Leipzig], Harley Emsden‑James [Southampton] na Senne Lammens yakuye mu Ikipe ya Royal Antwerp ku munsi wa nyuma.

Abakinnyi baguzwe na Manchester City: Rayan Aït‑Nouri [Wolverhampton], Marcus Bettinelli [Chelsea], Rayan Cherki [Lyon], Tijjani Reijnders [AC Milan], Sverre Nypan [Rosenborg], James Trafford [Burnley] na Gianluigi Donnarumma yaguze mur Paris Saint‑Germain ku munsi wa nyuma.