Guneya yandikiye CAF iyisaba Igikombe cyo mu 1976 cyatwawe na Maroke

Ishyirahamwe ry’Umupira w’Amaguru mu gihugu cya Guneya (FGF), ryandikiye Impuzamashyirahamwe y’Umupira w’Amaguru muri Afurika (CAF), isaba guhabwa Igikombe cy’Afurika cyo mu 1976 cyegukanywe n’Igihugu cya Maroke.

Ibi bije nyuma y’uko CAF yambuye Senegal Igikombe yatwaye muri Gashyantare (2) uyu Mwaka w’i 2026, itsinze Maroke ku mukino wa nyuma.

Icyo gikombe cyo mu 1976 Guneya isaba, cyari kitabiriwe n’amakipe umunani (8) nk’uko amategeko y’icyo gihe yabigenaga.

Muri iki gikombe cyakiniwe mu gihugu cya Etiyopiya (Ethiopia), amakipe yari agabanyije mu matsinda abiri (2), buri tsinda ririmo amakipe ane (4).

Itsinda rya mbere ryari ririmo amakipe ya ‘Etiyopiya, Guneya, Misiri (Egypt) ndetse n’Ikipe y’Igihugu ya Uganda’.

Mu gihe itsinda rya kabiri, ryari rigizwe n’amakipe arimo ‘Maroke (Morocco), Nijeriya (Nigeria), Zaire (Repubulika ya Demokarasi ya Congo) ndetse n’Ikipe y’Igihugu ya Sudani (Sudan)’.

Umukino wa nyuma wo mu itsinda rya mbere niwo wari gutanga Ikipe yegukana Igikombe.

Wahuje Maroke yari ku mwanya wa mbere isabwaga kunganya igatwara Igikombe, na Guneya yasabwaga gutsinda ngo itwara Igikombe.

Ku munota wa 33 Guneya yabonye igitego cyatsinzwe na Souleymane.

Nyuma y’iki gitego, Umunyazambiya Nyirenda Chayu wasifuraga uyu mukino, yatanze Ikarita Itukuru k’Umunyamaroke, Abdallah Semmat nyuma yo gukorera ikosa Papa Camara, Maroke irivumbura yikura mu kibuga.

Hashize iminota 15, Maroke yagarutse mu kibuga, ku munota wa 86 Ahmed Makrouh aragombora, umukino urangira ari igitego 1-1.

Bimwe Umunyarwanda yavuze ko inkuru y’Umwana isubira inyuma, nyuma yo kubona ko Maroke yahawe Igikombe cya 2025 cyakinwe muri 2026, hashingiwe ko Senegal yari yikuye mu kibuga, Guneya yibukiye CAF ko ibi byayibayeho mu 1976, nyamara ntiyahabwa Igikombe, bityo ko niba bahisemo kugiha Maroke bashingiye ko Senegala yari yikuye mu kibuga, nabo babaha icyo mu 1976 kuko Maroke yari yakikuyemo.

Gusa, benshi bafashe ko ibyo Guneya yakoze ari amashyengo ndetse CAF nta gaciro yabiha.

Ibi kandi ni nako bibonwa n’inzobere mu bijyanye n’amategeko, cyane ko bavuga ko bavuga ko itegeko ritakoreshwa umwanzuro ufatwa, ritashingirwaho nyuma y’uko rijyaho kandi nyamara mbere ritari rihari.

Amakuru akomeje gucicikana mu bitangazamakuru, ni uko Igikombe Senegal yatwaye, yamaze kukibika mu Kigo gikomeye mu bya Gisirikare mu gihugu cya Senegal, hirindwa ko hagira ushaka kugitwara.

Ni mu gihe kandi ntagihindutse, Ishyirahamwe rya Ruhago muri Senegal (FSF), byitezwe ko ritanga ikirego mu kanama nkemurampaka ka ruhago (TAS), mu rwego rwo guhabwa ubutabera.

CAF yo ivuga ko ibyakozwe bishingiye ku mategeko ndetse no kurwanya umuco wo kudahana, n’ubwo ibyakozwe nyuma y’Amezi hafi abiri (2) Senegal itwaye Igikombe, byafashwe na benshi nk’ikinegu ku mupira w’Amaguru muri Afurika, cyane ko ari gake Igikombe cyamburwa Ikipe yagitwariye mu kibuga, kigatangwa hisunzwe amategeko.

Amafoto