Clare Akamanzi yashimiye abitabiriye umwiherero wa ‘Basketball Without Borders’ n’u Rwanda rwawakiriye

Nyuma y'iminsi 4 i Kigali mu Rwanda habera umwiherero wa BWB [Basketball Without Borders], abawitabiriye biyemeje kuba abavugizi b'iterambere ry'umukino wa Basketball ku Mugabane w'Afurika.

Uyu mwiherero wakorwaga ku nshuro ya 21, wasojwe kuri uyu wa Kabiri tariki ya 26 Kanama [8] 2025.

Wari witabiriwe n'abakinnyi ba Basketball bakiri bato 60 b'abahungu n'abakobwa, bavuye mu bihugu 21 byo ku Mugabane w'Afurika.

Muri iki gihe cy'iminsi 4, baganirijwe kandi banahabwa ubumenyi na bamwe mu bakanyujijeho muri Shampiyona ya Basketball muri USA mu kiciro cy'abagabo n'icy'abagore [NBA na WNBA].

Bamwe muri aba bakanyujijeho, barimo; Tamika Devonne Catchings wakinnye muri WNBA ndetse na Kerry Kittles na Marvin Williams.

Uretse aba bahoze ari abakinnyi, Abatoza nka Charles Lee watoje Ikipe ya Charlotte Hornets, Lloyd Pierce utoza muri Indiana Pacers nk'Umutoza wungirije na Micah Nori utoza nk'umutoza wungirije muri Minnesota Timberwolves, bari mu bahaye ubumenyi aba bakinnyi b'ahazaza muri Basketball.

Ku ruhande rw'u Rwanda, rwari rufite abakinnyi 4 muri aba 60 bitabiriye uyu mwiherero.

Bari bagizwe na; Liliane Ingabire, Plamedie Bizimana Kayira, Sean Mwesigwa na Gabriel Ndoba Mwiba.

Asoza uyu uyu mwiherero, Umuyobozi bwa NBA ishami ry'Afurika, Clare Akamanzi yagize ati:“Twishimiye uko abatojwe bitwaye, kandi biraduha ikizere ko bazavamo abakinnyi beza ba Basketball mu Myaka iri imbere”.

Yakomeje agira ati:“Intego yacu ni ugushaka impano zitanga ikizere. Turifuza ko abitabiriye uyu mwiherero, batahana impinduka muri bo zo kumva ko bishoboka. Turashimira u Rwanda rwatwakiriye kandi buri kimwe cyagenze neza”.

Ku ruhande rw'Umuyobozi wa Basketball Africa League [BAL], Amadou Gallo Fall wari witabiriye isozwa ry'uyu mwiherero, yavuze ko uyu mwiherero by'umwihariko ari ingenzi mu kongerera ubumenyi abatoza bawitabira.

Sean Mwesigwa, umwe mu bakinnyi bane bari bahagarariye u Rwanda muri uyu mwiherero, yavuze ko yawigiyemo byinshi, by'umwhariko imyitozo bahawe n'abatoza muri NBA.

Kuva uyu mwiherero watangira mu 2001, abasaga 4,600 bavuye mu bihugu 144 bamaze kuwunyuramo.

Muri aba, 142 babonye amahirwe yo gukina muri Shampiyona ya Basketball muri USA, mu kiciro cy'abagabo [NBA] n'icy'abagore [WNBA].

Bamwe mu bakomeye banyuze muri Basketball Without Borders twavuga Abanyakameroni; Joel Embiid, ukinira Ikinira Ikipe ya Philadelphia 76ers na Pascal Siakam ukinira Ikipe ya Indiana Pacers.

Amafoto