CAF yongeye gutera ipine umukino wa APR FC na Pyramids FC

Impuzamashyirahamwe y'umupira w'amaguru muri Afurika, CAF, yatangaje ko umukino ubanza wa CAF Champions League wagombaga guhuza APR FC yo mu Rwanda na Pyramids FC yo mu Misiri, watewe ipine.

Iterwa ipine ry'uyu mukino, rishingiye kuri Shampiyona y'Isi y'Amagare izakinirwa i Kigali, hagati ya tariki ya 21-28 Nzeri [9] 2025.

Uyu mukino wari uteganyijwe gukinirwa kuri Sitade Amahoro i Remera, aha kandi hakaba hari muri hamwe mu hazakoreshwa n'abakinnyi bazitabira iyi Shampiyona.

CAF yimuye uyu mukino, nyuma y'uko imenyeshejwe na APR FC ko Sitade Amahoro itazaba iboneka hagati ya tariki ya 15-18 Nzeri [9] 2025.

Aha kuri Sitade Amahoro, hazaba hakoreshwa nk'ikicaro cy'ibikorwa by'ingenzi muri iyi Shampiyona y'Isi, bityo kuhabangikanya n'ibindi bikorwa by'imikino bikaba bidashoboka.

Mbere yo kwimura amatariki, uyu mukino wari uteganyijwe gukinirwa kuri Sitade Amahoro hagati ya tariki ya 19-21 Nzeri [9] 2025, washyizwe tariki ya 01 z'Ukwezi k'Ukwakira [10] 2025, mu gihe uwo kwishyura uzakinirwa i Cairo, washyizwe tariki ya 05 z'Ukwakira [10] 2025, mu gihe wari uteganyijwe hagati ya tariki ya 26-28 Nzeri [9] 2025.

Umukino ubanza uheruka guhuza aya makipe yombi yongeye gutomborana ku nshuro ya gatatu yikurikiranya, wari warangiye aguye miswi y'igitego 1-1, mu gihe uwo kwishyura, APR FC yatsinzwe ibitego 4-1, isezererwa ku giteranyo cy'ibitego 5-2 mu mikino yombi.