Basketball: Murenzi Yves yagizwe Umutoza w'Ikipe y'Igihugu yitegura gushaka itike y'Igikombe cy'Isi

Ishyirahamwe ry'umukino wa Basketball mu Rwanda, FERWABA, ryahaye Murenzi Yves inshingano zo gutoza Ikipe y'Igihugu yitegura amajonjora y'imikino yo gushaka itike y'igikombe cy'Isi.

Aya majonjora ateganyijwe kuzabera mu gihugu cya Tuniziya hagati ya tariku ya 27 na 30 Ugushyingo [11] 2025.

Murenzi wari usanzwe umenyerewe nk'umutoza w'amakipe y'abakiri bato, yahawe izi nshingano asimbuye, Umunyasenegal Cheikh Sarr, weguye kuri uyu mwanya mu Kwezi gushize.

N'ubwo azwiho gutoza amakipe y'abakiri bato, Murenzi yari asanzwe ari Umutoza wungirije w'Ikipe y'Igihugu y'abakuru guhera mu 2021.

Mu 2023, yafashije iyi Kipe kwegukana Umudali wa Bronze mu mikino y'Igikombe cy'Afurika, ubwo yayisigaranaga nk'umutoza mukuru.

Nyuma yo guhabwa izi nshingano nk'Umutoza mukur, Murenzi azungirizwa na: Sunny Niyomugabo usanzwe atoza mu Ikipe ya Patriots BBC, Kenny Gasana umwe mu bakinnyi bubatse amateka muri Basketball yo mu Rwanda ndetse na Aristide Mugabe.

Ntagihindutse, iri Tsinda ry'Abatoza rizahura mu mpera z'iki Cyumweru, aho biteganyijwe ko aribwo rizanahitamo abakinnyi bazitabira imyiteguro y'aya majonjora.

Muri iyi mikino izakinirwa muri Tuniziya, u Rwanda ruri mu Itsinda rya gatatu, rusangiye n'amakipe arimo: Nijeriya, Guneya na Tuniziya.

Aha muri Tuniziya kandi, hazaba hakinira amakipe ari mu Itsinda rya mbere, agizwe na: Kameroni, Sudani y'Epfo, Libya na Cape Verde.

Twibutse ko u Rwanda rwatsindiye umwanya wo gukina aya majonjora, nyuma yo kuba mu makipe 16 yitabiriye Igikombe cy'Afurika cyakiniwe muri Angola hagati ya tariki ya 12 na 24 Kanama [8] 2025.