Basketball: APR WBBC yasinyishije Abanyamahanga 3 izifashisha muri Zone 5

Ikipe y'Ingabo z'u Rwanda mu mukino wa Basketball mu kiciro cy'abagore (APR WBBC), yasinyishije Abanyamahanga 3 biyongereye mu bakinnyi izakoresha mu mikino ya FIBA Zone 5, izakinirwa i Nairobi mu gihugu cya Kenya, hagati ya tariki ya 9 n'iya 15 z'Ukwezi k'Ugushyingo (11) 2025.

Aba bakinnyi barimo Umunya-Senegal “Yacine Diop”, Umunya-Angola “Italee Lucas” n'Umunyamerika “A’Lexxus Davis”.

Yacine Diop usanzwe ari Kapiteni w'Ikipe y'Igihugu ya Senegal, yabengutswe na APR WBBC, mu mikino y'Igikombe cy'Afurika, cyakiniwe muri Ivory Coast.

Uyu mukinnyi w'Imyaka 30 y'amavuko, yitezweho kuzafasha APR WBBC, mu rugamba rwo kuyihesha Itike y'Igikombe cy'Afurika (WBLA).

Italee Lucas w'Imyaka 36 na A’Lexxus Davis w'Imyaka 29, nabo ni bamwe mu bakinnyi APR WBBC ihanze amaso, cyane ko iyi mikino izakinirwa muri Kenya, izitabirwa n'amakipe y'ibihangange mu Karere.

By'umwihariko, ubunararibonye bwa A’Lexxus Davis wakinnye mu bihugu bitandatu birimo; Australia (Cougars), Germany (Baskets), Ireland (Meteors), Syria (Al Thawra), Albania (Teuta) na USA, ni kimwe mu byo APR WBBC ihanze amaso.

Mu makipe y'ibikonyozi azaba ari muri iri rushanwa, arimo na “Al Ahly” yo mu Misiri, yegukanye iri rushanwa mu mwaka ushize (2024).

Uretse kwegukana iri rushanwa mu mwaka ushize, Al Ahly izaryitabira ibikesha kwegukana Igikombe cya Misiri (Egyptian Cup), nyuma yo gutsinda ku mukino wa nyuma Sporting Club, amanota 99-64.

Umwaka ushize, APR WBBC yasoje irushanwa nk'iri yegukanye umwanya wa gatatu, itsinze SC Ville de Dakar amanota 96-94, mu mukino wakiniwe muri Marius Ndiaye Arena.

Ku ruhande rw'u Rwanda uretse APR WBBC, Ikipe y'Ikigo cy'Igihugu cy'Ingufu, REG WBBC, nayo izitabira iri rushanwa.