Amakipe abiri yo muri Sudani agiye kwemererwa gukina Shampiyona y'u Rwanda

Nyuma y'uko bitayakundiye gukina Shampiyona y'ikiciro cya mbere cy'umupira w'amaguru mu Rwanda mu Mwaka ushize, kuri iyi nshuro, amakipe ya Al Hilal Omdurman na Al Ahli SC Wad Madani zo mu gihugu cya Sudani, arakoza imitwe y'intoki ku byo yari yangiwe mu Mwaka wa Shampiyona y'i 2024-25.

Aya makipe yombi, yasabye CAF ko yayemerera gukina mu Rwanda cyangwa mu kindi gihugu cyo muri Afurika cyabakira, nyuma y'uko mu gihugu cyabo hari Intambara imaze Imyaka hafi 3 ica ibintu, hagati y'Ingabo za Leta n'Umutwe wa Rapid Support Forces (RSF).

Umwaka ushize, Al Hilal Omdurman na Al Ahli SC Wad Madani, zakinnye Shampiyona yo muri Mauritania, nyuma yo kutakirwa n'Ishyirahamwe rya Ruhago mu Rwanda, FERWAFA.

Amakuru agera kuri THEUPDATE, yemeza ko ntagihindutse, aya makipe yombi ashobora gutangira gukina Shampiyona y'ikiciro cya mbere mu Rwanda, guhera ku munsi wa gatanu.

Mu gihe yaramuka yakiriwe nk'uko byitezwe, Shampiyona yahita igira amakipe 18, avuye kuri 16 yari asanzwe amenyerewe n'abakunzi ba ruhago.

Shampiyona y’u Rwanda y'Umwaka w'i 2025-26, yatangiwe gukinwa tariki ya 12 Nzeri (9).

Amakuru THEUPDATE ifite kandi, avuga ko mu gihe aya makipe azaba atangiye gukina Shampiyona, azakora ibishoboka byose, ku buryo imikino ibanza ya Shampiyona, izarangizwa gukinwa anganya imikino n'andi, bityo akazakina imikino myinshi yegeranye nk'uko byitezwe.

Twibutse ko mu gihugu cya Sudani, guhera mu 2023 nta Shampiyona ikinwa, bitewe n'Intambara twagarutseho haruguru.

Mu bihe bitandukanye, Amakipe yo muri iki gihugu arimo nka 'Al-Merrikh', yakunze kuza mu Rwanda kuhitegurira imikino ny'Afurika ndetse n'amwe muri yo, akaba yarahakiriwe imikino mu bihe bitandukanye.

Muri uyu mwaka w’imikino, Al-Merrikh yemerewe gukina muri Shampiyona ya Libya mu rwego rwo kuyifasha gukomeza kwitegura imikino mpuzamahanga ndetse no kubona imikino myinshi ihagije.

Uretse mu Mupira w'amaguru, u Rwanda rwakiriye Abanyeshuri batari bacye bo mu Ishami ry'Ubuvuzi, basabye kwimurira amasomo yabo mu Rwanda, nk'Igihugu gitekanye kandi gitanga amahoro kuri buri wese.

Ku bijyanye na Ruhago, Abakunzi bayo mu Rwanda, bavuga ko aya makipe azongerera urwego Shampiyona ndetse akaba yanagira uruhare rukomeye mu kongerera uburyohe imikino ya Shampiyona.

Mu bihe bitandukanye, abakunzi b'umupira w'amaguru bakunze kuvuga ko mu Rwanda haba amakipe abiri gusa (APR FC na Rayon Sports), ariyo akunze gusimburana ku bikombe bikinirwa imbere mu gihugu, ibi bikaba biyabeshya ko akomeye, nyamara yagera ku ruhando mpuzamahanga, agasezererwa atarenze umutaru.

Bityo, aya makipe yo muri Sudani, akaba ari igipimo nyacyo, cyane ko ku kijyanye n'amikoro, atajenjetse.

Amafoto

Al Hilal yo muri Sudani, yacakiranye na APR FC yo mu Rwanda mu mikino ya CECAFA Kagame Cup yakiniwe mu gihugu cya Tanzaniya. (Ifoto/Ububiko)