Aliou Diarra wakiniraga APR BBC yerekeje muri Shampiyona y'Ubutaliyani

Umukinnyi mpuzamahanga w'Umunyamali, Aliou Diarra, wakiniraga Ikipe y'Ingabo z'u Rwanda, APR BBC,yerekeje muri Shampiyona y'ikiciro cya mbere mu Butaliyani, mu Ikipe ya Virtus Pallacanestro Bologna.

Mbere yo kwerekeza muri APR BBC, Diarra w'Imyaka 23 gusa y'amavuko, yazamukiye mu Ikipe ya  Stade Malien y'iwabo muri Mali.

Yatangiye kubonwa nk'Inyenyeri ya Basketball muri Mali, ubwo yitabiraga Imikino ya Basketball Africa League [BAL] 2023, ndetse anayihembwamo nk'umukinnyi wahize abandi mu kugarira.

Nyuma Basketball Africa League, yahise agurwa na APR BBC, anayifasha guhita yegukana Igikombe cya Shampiyona cyo mu 2024 no gutwara icy'uyu Mwaka w'i 2025.

Uretse kuyihesha Igikombe cya Shampiyona, muri uyu Mwaka w'i 2025 yayifashije kwegukana umwanya wa gatatu muri Basketball Africa League.

Muri iri rushanwa raykiniwe muri Afurika y'Epfo, Diarra yongeye gutorwa nk'uwahize abandi kugarira ndetse n'uwitwaye neza mu kubuza imipira kwinjira mu nkangara.

Ku ruhande rw'Ikipe y'Igihugu, uyu Mwaka nabwo wabaye mwiza kuri Diarra, kuko yafashije Mali kwegukana umwanya wa kabiri mu gikombe cy'Afurika cyakiniwe muri Angola, umwanya mwiza Igihugu cye cyari kigize mu mateka.

Nk'umukinnyi ku giti cye, yanatowe mu Ikipe y'abakinnyi 5 bahize abandi muri iri rushanwa.

Umwe mu mikino itazibagirana kuri we muri iri rushanwa, n'uwo Mali yahuyemo na Ivory Coast, awutsindamo amanota 35 wenyine, anakora rebounds 16.

Tariki ya 08 z'Ukwezi gushize kwa Nyakanga [7] 2025, yatoranyijwe n'Ikipe ya Dallas Mavericks yo muri NBA, ayikinira mu marushanwa ya  G-League International.

Akomoza ku igurwa rya Diarra, umuyobozi ushinzwe ibikorwa mu Ikipe ya Virtus Pallacanestro Bologna, Paolo Ronci, yagize ati:“Ni umwe mu bakinnyi twari dukeneye. Turi gukora ibishoboka byose ngo dufashe umutoza wacu,  Ivanovic, kubona abakinnyi beza azakoresha muri Shampiyona. Diarra ni umukinnyi muto, tumwitezeho umusaruro mu bihe biri imbere”.