AMAFOTO: APR FC yanyagiye Mukura VS&L ikomeza kwiruka inyuma ya Al Hilal SC

Ikipe y’Ingabo z’u Rwanda, APR FC, yaraye ivuye mu Karere ka Huye ihakuye amanota 3 nyuma yo kuhatsindira Mukura VS&L ibitego 3-0 mu mukino wakiniwe kuri Sitade ya Kamena.

Iyi ntsinzi yafashije APR FC gukomeza kwiruka inyuma ya Al Hilal SC yo muri Sudani yemerewe gukina Shampiyona y’u Rwanda.

Aya manota 3 yo ku munsi wa 28, yatumye APR FC igira amanota 55, mu gihe Al Hilal SC ifite amanota 61.

Ibitego bya APR FC byatinzwe na Djibril Ouattara ku munota wa 51, Hakim Kiwanuka asongamo ku wa 56, mu gihe Nduwayo Alexis yatsinze agashinguracumu ku munota wa 63.

N’ubwo ibitego byagiyemo byiyungikanya, ntabwo ari umukino wari woroshye, kuko amakipe yombi yari yasoje igice cya mbere aguye miswi y’ubusa ku busa.

Uretse ibi bitego 3 APR FC yatsinze kandi, yanahushije Penaliti yahushijwe na Djibril Ouattara ku munota wa kane gusa w’umukino.

Ni umukino Mukura VS&L yagiye ihusha uburyo bwinshi bwo kunyeganyeza amazamu, burimo ubwageragejwe na ‘Iradukunda Elia Tatou, Joseph Sackey na Patrick Mutsinzi’.

Patrick Mutsinzi yavuze uburyo bukomeye bwo kunyeganyeza amazamu ku munota wa 32 w’umukino, nyuma yo kugongana n’Umunyezamu wa APR FC, Hakizimana Adolphe wahise ajyanwa no kwa muganga, asimbuzwa Ruhamyankiko Yvan.

Mu yindi mikino yakinwe kuri uyu wa Gatandatu tariki ya 25 Mata (4) 2026, AS Muhanga yatsindiwe mu rugo na Gorilla FC 2-1, Al Hilal itsinda Musanze FC 2-0.

Kuri iki Cyumweru, Etincelles FC irakira Kiyovu Sports, Amagaju FC acakirane na Rayon Sports kuri Sitade Kamena, mu gihe Al Merrikh SC yisobanura Bugesera FC.

Mu gihe urugamba rwo gushaka igikombe rugeze mu mahina, amakipe ari mu myanya ya nyuma nayo ntabwo yorohewe, kuko Rutsiro FC iri ku myanya wa 17 irushwa amanota 3 na Etincelles FC iri ku mwanya wa 16, mu gihe AS Muhanga ari iya nyuma n’amanota 21.

Amafoto