CAF Champions League: APR FC yatomboye ikipe yo muri Repubulika ya Demokarasi ya Congo

Ikipe ya APR FC itomboye Les Aigles du Congo FC yo muri Repubulika ya Demokarasi ya Congo, mu ijonjora ry’ibanze ry’imikino ya CAF Champions League.

APR n’iramuka ikuyemo iyi kipe yashinzwe muri Kanama y’i 2023, izahura n’izava hagati ya Zamalek SC yo mu Misiri na AS Port yo muri Djibouti.

Imikino ibanza izakinwa hagati ya tariki ya 4-6 Nzeri 2026, mu gihe iyo kwishyura izakinwa hagati ya tariki 11-13 Nzeri 2026.

Umukino ubanza uzakinirwa muri Repubulika ya Demokarasi ya Congo, mu gihe uwo kwishyura uzakinirwa i Kigali.

APR FC n’iramuka ikomeje, yazakina ijonjora rya kabiri rigana mu matsinda hagati ya tariki ya 25–27 Nzeri 2026 mu mukino ubanza, mu gihe uwo kwishyura wazakinwa hagati ya tariki ya 2–4 Ukwakira 2026.

Les Aigles du Congo FC isanzwe ikinira kuri Stade des Martyrs ku murwa mukuru wa muri Repubulika ya Demokarasi ya Congo i Kinshasa, yegukanye shampiyona y’i 2024-25.

Yashinzwe na Vidiye Tshimanga, Umunyapolitike ndetse n’umucuruzi ukomeye muri DC Congo.

Iyoborwa na Olivier Pengongo kuva mu kwezi k’Ukwakira (10) 2025, wasimbuye Tshimanga wayishinze, kuri ubu usigaye ari umuyobozi wayo w’icyubahiro.

Hashinze imyaka hafi itandatu APR FC ititwara neza mu marushanwa ny’Afurika.

Mu mwaka w’imikino 2020-21, yasezerewe na Gor Mahia (Kenya) iyitsinze ibitego 4-3 mu mikino yombi.

Mu 2021-22, yasezereye Mogadishu City Club (Somalia) mu ijonjora ry’ibanze iyitsinze ibitego 2-1, isezererwa na Etoile du Sahel (Tunisia) mu ijonjora rya kabiri, itsinzwe ibitego 3-1.

Mu 2023-24, yasezereye Gaadiidka FC (Somalia) iyitsinze ibitego 3-1, iza gukurwamo na Pyramids FC (Egypt) itsinzwe ibitego 6-1 mu mikino yombi.

Mu 2024-25, yasezereye Azam FC (Tanzania) iyitsinze ibitego 2-1 mu mikino yombi, ikurwamo na Pyramids FC (Egypt) iyitsinze ibitego 4-2 mu mikino yombi.

Mu mwaka ushize, 2025-26, yongeye gusezererwa na Pyramids FC (Egypt) iyitsinze ibitego 5-0 mu mikino yombi.

Amafoto

Les Aigles du Congo FC 

APR FC.