Thomas Partey na Arsenal bemeranyijwe gutandukana

Nyuma y'Imyaka itanu akina muri Arsenal, uyu mukinnyi mpuzamahanga w'Umunya-Ghana agiye gutandukana nayo.

Thomas Teye Partey yinjiye muri Arsenal avuye muri Atletico Madrid mu Mwaka w'i 2020, aguzwe Miliyoni z'Amapawundi [£45 million], angana na Miliyoni 50 z'Amayero [€50 million].

Ugutandukana kw'impande zombi, kuje nyuma y'ibiganiro by'igihe kirekire byari bigamije ko yakongera amasezerano ariko ntibigire icyo bitanga.

Amasezerano Partey yari afitanye na Arsenal, ararangira n'iri Joro ryo ku wa 30 Kamena [6] 2025.

Nyuma yo kumenya amakuru ko yananiwe kumvikana na Arsenal, amakipe yo muri Shampiyona ya Turukiye n'Ubutaliyani, yamubwiye ko amarembo akinguye.

Uyu mukinnyi ukina mu kibuga hagati yugarira, yakunze kurangwa n’imvune z'urutavanaho, ariko igihe yabaga ari muzima n'umwe mu bafashije Arsenal bidasubirwaho.

Izi mvune kandi nizo zamukomye mu nkokora, zimubuza gukomeza kugirirwa ikizere na Atletico Madrid, imugirisha muri Arsenal.

Mbere y'uko ananiranwa ku bijyanye no kongera amasezerano muri Arsenal, Partey yari amaze kuyikinira imikino irenga 160, ayitsindira ibitego 09.

Imvune zamubayeho karande, zamushyize hanze y'ikibuga imikino irenga 50 mu myaka ibiri ishize.

Imyaka isatira 32 y'amavuko, kongeraho izi mvuze, byasunikiye Umutoza Mikel Arteta na Andrea Belta ushinzwe ibijyanye na Tekinike muri Arsenal, kutemera kumuha amasezerano y'Imyaka 3 yashakaga.

Mu gihe impande zombi zari zananiwe kumvikana, Arsenal yari yatangiye guca undi muvuno, aho kuri ubu bivugwa ko yamaze kurangizanya n'Umunya-Esipanye, Martin Zubimendi wakiniraga Real Sociedad.

Igenda rya Partey rije ryiyongera kurya Jorge Luiz Frello Filho Cavaliere uzwi nka Jorginho werekeje muri Brasil.

Mu gihe Partey bivugwa ko yamaze kubona umusimbura, no ku ruhande rwa Jorginho niko bimeze, kuko Arsenal bivugwa ko yamaze kumvikana n'Umunya-Denmark, Christian Nørgaard wakiniraga Ikipe ya Brentford.

Mu igihe kandi isoko ry’igura n’igurisha ririmbanyije, biravugwa ko Arsenal iri mu biganiro na Kepa Arrizabalaga [Umunyezamu], Cristhian Mosquera [Myugariro] n’abarutahizamu Viktor Gyökeres na Benjamin Šeško.

N'ubwo imaze imyaka irenga makumyabiri itazi uko gutwara shampiyona y’Ubwongereza bimera, mu myaka itatu ishize, Arsenal yerekanye ko yahangana iramutse yiyubatse uko bikwiye.