Thomas Müller yakinnye umukino wo gusezera kuri Bayern Munich

Thomas Müller yakinnye umukino wa nyuma muri FC Bayern Munich nyuma y'imyaka 25 yari ayimazemo.

Uyu mukinnyi mpuzamahanga ukomoka mu Budage, yatangiye gukinira Bayern Munich mu Mwaka w'i 2000, ahereye mu Ikipe y'abakiri bato.

Ku myaka 35, Müller yasezeye nyuma yo gukina umukino wa ¼ cy'Igikombe cy'Isi cy'ama-Clubs, ikipe ye yatsinzwemo na Paris Saint Germain, ibitego 2-0.

Muri uyu mukino, yinjiye mu kibuga hasigaye imikino 10 gusa ngo umukino urangire.

N'ubwo uyu mukino wakinwe ku wa Gatandatu w'Icyumweru gishize ari wo wa nyuma yari ayikiniye, icyemezo cyo kutazongera kuyikinira yari yarakibamenyesheje mu Kwezi kwa Mata [4] 2025.

Ni mu gihe biteganyijwe ko amasezerano ye, azarangira tariki ya 31 Nyakanga [7] 2025.

Kuva yatangira guconga ruhago bya kinyamwuga, FC Bayern Munich niyo kipe rukumbi, Müller yakiniye.

Gusa, hagati y'Umwaka w'i 1993 kugeza mu ntangiriro za 2000, yanyuze mu Ikipe y'abana ya TSV Pähl.

Nyuma yo kumara Imyaka 8 mu Ikipe z'abakiri bato, Müller yashyizwe mu Ikipe nkuru ya FC Bayern Munich afite Imyaka 18 gusa y'amavuko.

Umukino wa mbere mu Ikipe nkuru, yawukinnye tariki ya 10 Kanama [8] mu 2008.

Uyu mukino wari uwa Shampiyona y'Ubudage izwi nka Bundesliga, umukino FC Bayern Munich yari yakiriyemo Hamburger SV.

Uyu wabaye inzira yaharuye ubuhangange bwe muri Ruhago, ndetse agerageza no gutera ikirenge mu cy'Umubyeyi we [Papa], Gerd Müller.

Niwe mukinnyi wakiniye FC Bayern Munich imikino myinshi mu mateka yayo, kuko uwayihuje na Paris Saint Germain wari uwa 755.

Byahise bimugira umukinnyi wakuyeho agahigo k'imikino 709, yakinnye na Sepp Maier 

Mu mikino 709, Müller yayitsinzemo ibitego birenga 250, anayitangamo imipira yayivuyemo ibitego birenga 200.

Mu Mwaka 25 nk'umukinnyi wa FC Bayern Munich, yegukanyemo Ibikombe 13 bya Shampiyona, birimo 11 yatwaye yikurikiranya.

Uretse Shampiyona, yegukanye kandi ibindi bikomb bikomeye birimo na 2 bya  UEFA Champions League.

Ku rwego rw'Ikipe y'Igihugu, yayikiniye imikino 131, ayitsindira ibitego 45.

N'umwe mu bakinnyi kandi bari mu Ikipe y'Igihugu y'Ubudage izwi nka 'Die Mannschaft', yegukanye Igikombe cy'Isi cyo mu 2014, itsinze Argentine ku mukino wa nyuma.

Nka rutahizamu, iki gikombe cy'Isi yagitsinzemo ibitego 5, birimo n'icyo mu mukino wa ½ banyagiyemo Brazil ibitego 7-1.

Mu Mwaka w'i 2010 kandi ubwo Umugabane w'Afurika wakiraga imikino ya nyuma y'Igikombe cy'Isi cyakiniwe muri Afurika y'Epfo, Müller wari ufite Imyaka 21 gusa y'amavuko, yatsinzemo ibitego 5, anahembwa nk'umukinnyi muto wahize abandi kwitara neza.

Nyuma yo gusezera muri FC Bayern Munich, biravugwa ko ashobora kwerekeza muri Shampiyona ya Leta zunze Ubumwe z'Amerika, izwi nka Major League Soccer.