Ten Hag yasinyiye gutoza Bayern Leverkusen mu Myaka 2 iri imbere

Nyuma y’iminsi 215 nta kazi, Umuholandi Erik Ten Hag yasinye amasezerano yo gutoza Beyern Leverkusen mu Myaka ibiri iri imbere.

Uyu Muholandi w’imyaka 55, yahawe aka kazi n'iyi Kipe yo mu Budage nyuma yo kumara amezi hafi Umunani [8] ari umushomeri.

Ni nyuma yo gusezererwa na Manchester United yo Bwongereza mu Kwakira [10] k'Umwaka ushize.

Amasezerano hagati ya Ten Hag na Leverkusen, azatangira kubahirizwa tariki 01 Nyakanga [7] uyu mwaka, kugeza mu 2027.

THEUPDATE yabonye ko azajya ahabwa Umushahara wa Miliyoni 5.5 z’Amayelo buri Mwaka.

Aya masezerano natangira gushyirwa mu ibikorwa, azamugira umutoza wa kabiri uhembwa amafaranga menshi muri Shampiyona y'Ubudage izwi nka Bundesliga, nyuma ya Vincent Kompany wa Beyern Munich uhembwa Miliyoni 10.4 z’Amayelo.

Ten Hag watangiriye umwuga wo gutoza mu 2003 mu Ikipe z'abakiri bato za Twente mu Buholandi, n'umwe mu batoza bafatwa nk'abatanga ikizere.

Iyi FC Twente, ni nayo yatangiriyemo umwuga wo guconga ruhago nk'uwabigize umwuga mu 1989 kugeza 2002 ubwo yavaga mu kibuga.

Ishingiye ku kazi keza yakoze akiri mu makipe y'abato, FC Twente yamugiriye ikizere, imuzamura mu Ikipe ya mbere mu 2007.

Mu 2017, Ten Hag yagize umutoza mukuru wa Ajax, ayimaramo Imyaka  itanu mbere yo kwerekeza muri Manchester United mu 2022.

Muri Ajax, yahakoze amateka arimo gutwara ibikombe bitatu bya Shampiyona, anayifasha kugera muri ½ cya UEFA Champions League mu mwaka w’imikino w'i 2018-2019, asezereye Real Madrid muri ¼.

Nk'Umutoza wa Manchester United, yayimazemo imyaka ibiri n’amezi atatu, ayatoza imikino 128.

Muri iyi mikino, yatsinzemo 70, anganya 23 atsindwa imikino 35.

Yayifashije kandi kwegukana Igikombe cya FA Cup n'icya EFL Cup kizwi nka Carabao Cup.