Premier League: Umunsi wa 2 winjijwemo Ibitego 28, Amakipe y’i Manchester aragayika

Impera z'Icyumweru gishize, zakinwaga umukino w'umunsi wa kabiri wa Shampiyona y'Ubwongereza izwi nka English Premier League.

Uyu munsi waraye ushyizweho akadomo n'umukino Newcastle United yari yakiriyemo Liverpool.

Umukino wahuje izi mpande zombi, wabonetsemo ibitego 5, birimo 3 byatsinzwe na Liverpool yegukanye intsinzi.

Ibi bitego 5, byahisemo bisiga hinjijwe ibitego 28 byose hamwe mu mikino 10 yakinwe.

Uyu munsi wa kabiri ntabwo wahiriye amakipe yo mu Mujyi wa Manchester, kuko Man City yabimburiye imikino y'umunsi wa kabiri, yatsinzwe na Tottenham Hotspur ibitego 2-0, mu gihe Man Utd yaguye miswi y'igitego 1-1 na Fulham y'i London-Londre.

Mu gihe amakipe y'i Manchester yagayikana, ay'i London-Londre yakomeye kwishimira intsinzi ndetse n'ayo mu Mujyi wa Liverpool.

Tottenham Hotspur yatsinze Man City ibitego 2-0, Arsenal inyagira Leeds United ibitego 5-0, Everton itsinda Brighton & Hove Albion F.C ibitego 2-0, mu gihe Liverpool yaraye intsinze Newcastle United ibitego 3-2.

Iyi mikino y'umunsi wa kabiri isize Arsenal, Tottenham Hotspur na Liverpool ziyoboye urutonde rwa Shampiyona n'amanota 6, mu gihe i Manchster bitoroshye, kuko Man City iri ku mwanya wa gatandatu n'amanota 3, mu gihe Man Utd iri ku mwanya wa 16 n'inota 1.

Amakipe ya Brighton & Hove Albion FC, Wolves na Westham United, zikurikiranye mu myanya itatu ya nyuma.

Mu mpera z'iki Cyumweru, hateganyijwe umukino ukomeye, uzahuza Liverpool na Arsenal.

Igikombe cya Shampiyona cy'Umwaka ushize, kibitswe na Liverpool, yahise yuzuza icya 20, inganya na Manchester United.

Amafoto