Messi yaje imbere ya Cristiano mu batsinze ibitego byinshi bitarimo Penaliti

Kizigenza mpuzamahanga w'Umunya-Argentine, Lionel Messi, yakoze amateka yo kuba umukinnyi uyoboye abamaze gutsinda ibitego byinshi bitarimo ibya Peneliti.

Aka gahigo yagakoze mu mukino Inter Miami yatsinzemo New York Red Bulls ibitego 5-1, muri shampiyona ya USA izwi nka Major League Soccer.

Ibitego 2 yatsinze muri uyu mukino, byamufashije kuzuza ibitego 874 amaze gutsinda kuva yatangira guconga ruhago nk’uwabijyize umwuga, n'ibitego 764 bitarimo Penaliti.

Kuzuza ibi bitego, byahise bituma anyura kuri mukeba we w'ibihe byose, Cristiano Ronaldo, ufite ibitego 763.

N'ubwo yamunyezeho, Ronaldo aracyayoboye abakinnyi bamaze gutsinda ibitego byinshi ku Isi, mu bakiri mu kibuga, 938.

Kuri ubu, Messi w'Imyaka 38, yafashije Ikipe ye ya Inter Miami gutsinda ibitego 10 mu mikino 6 yakinnye mu mikino y'Igikombe cy'Isi cy'Ama-Clubs, yakiniwe muri USA hagati ya Kamena [6] na Nyakanga [7] 2025.

Kuri ubu, Messi niwe mukinnyi ufite amateka yo gutanga imipira myinshi yavuyemo ibitego, kuko yatanze 386.

Cristiano w'Imyaka 41 kuri ubu, amaze gutsinda ibitego 938, birimo 175 bya Penaliti.

Uyu mukinnyi uherutse kongera amasezerano y'Imyaka 2 muri Al-Nassr yo muri Arabia Soudite, yatangaje ko ashaka kuzava mu kibuga jujuje ibitego 1000.

Mu myaka 20 ishize, habaye guhatana kudasanzwe no kwibaza uwaba ari mwiza hagati y'aba bakinnyi bombi.

Nyuma y'uko Messi yegukanye Igikombe cy'Isi hamwe na Argentine mu 2022, benshi bamugize umukinnyi wa mbere ku Isi kuri ubu, gusa hari n'abavuga ko ibyo Cristiano yakoze nawe bitarenzwa ingohe.

Mu gihe akiri mu kibuga, amahirwe Cristiano asigaje yo gutwara Igikombe cy'Isi, n'umwaka utaha, mu gikombe giteganyijwe gukinirwa muri Amerika, Canada na Mexique.

Aba bombi n'ubwo bari kugana mu bihe byabo bya nyuma byo guconga ruhago, Isi y’umupira w'amaguru iracyabereka ko ititeguye kubarekura, dore ko bigoranye ko hazabaho ihangana nk’iryabaranze mu Binyacumi 2 bishize.