Marcus Rashford yatijwe muri FC Barcelona

Marcus Rashford wakiniraga Ikipe ya Manchester United, yatijwe mu Ikipe ya FC Barcelona muri Esipanye.

Uyu mukinnyi mpuzamahanga w'Ikipe y'Igihugu y'Ubwongereza, yaraye yerekanwe mu ijoro ryakeye.

Ku myaka 27 y'amavuko, Rashford yatijwe umwaka umwe muri Barcelona.

Amakuru amwerekeza muri FC Barcelona, yatangiye guhwihwiswa mu Kwezi kwa Mutarama [1] y'i 2025. Gusa, icyo gihe ntacyo impande zombi zabivuzeho.

Itizwa rye muri FC Barcelona, ryaje nyuma y'ibiganiro byihariye byamuhuje komite nyobozi y'iyi kipe, yari iyobowe na Joan Laporta.

Nyuma yo kugera mu Ikipe nshya, bitandukanye na Nimero 10 yambaraga muri Manchester United, yahawe nimero 14.

Nimero 14 yahawe, iherukwa kwambarwa n'abakinnyi barimo; Coutinho, Malcom, Nico González, Memphis Depay na João Félix. 

Yasinyiye FC Barcelona nyuma y'uko inaniwe gusinyisha Nico Williams ukinira Athletic Bilbao na Luis Díaz wa Liverpool.

Isinya rye muri FC Barcelona, ryamugize umukinnyi wa kabiri mu amateka yayo wakiniye Manchester United uyerekejemo, nyuma ya Mark Hughes.

Yabaye kandi umukinnyi wa kabiri w'Umwongereza ukiniye FC Barcelona, nyuma ya Gary Lineker wayikiniye mu 1989. 

Mu gihe agifitanye amasezerano y'Imyaka 3 na Manchester United, Ikipe zombi zemeranyijwe ko aramutse yitwaye neza, FC Barcelona yamugura itanze Miliyoni 30 z’Amayero. 

Rashford wakuriye mu Ikipe z'abakiri bato za Manchester United, yazamuwe mu Ikipe ya mbere mu 2015 ngoma y'Umutoza Van Gaal, nyuma yo kugaragaza impano idasanzwe mu Ikipe y'abatarengeje Imyaka 18.

Kuva icyo gihe, yabaye umwe mu bakinnyi ngenderwaho muri Manchester United kugeza mu ntangiriro za 2024.

Yafatwaga nk'umwe mu bakinnyi bashobora kwibagiza abakunzi ba Manchester United abarimo; Wayne Rooney, Cristiano Ronaldo n’abandi... ariko ntabwo ariko byagenze.

Nk'umwe mu bagenderwagaho, yafashije Manchester United kwegukana Ibikombe bitandukanye birimo FA Cup, Europa League na Carbao Cup.

Nk'umukinnyi ku igiti cye, yahembwe nk'uwahize abandi muri Shampiyona y’Ubwongereza inshuro ebyiri. Ibi kandi byajyanye no kuba umukinnyi watsinze ibitego byinshi, inshuro ebyiri.

Mu Mwaka ushize [2024], ubwo Roben Amorim yagirwaga umutoza mushya wa Manchester United, Rashford yatangiye kuba umukinnyi usanzwe.

Yatangiye kwerekwa ko atakiri umukinnyi ngenderwaho ndeste yisanga k’urutonde rw'abagomba kuva muri iyi kipe.

Byaje kuba impamo, atizwa muri Aston Villa, yasorejemo Umwaka ushize w'imikino.

Ukutumvikana kwe na Amorim bivugwa ko kwashiye ku buryo uyu mukinnyi yakinishwamo, butandukanye n'ubwo yari asanzwe amenyereye.

Amorim yamushinje kutitangira Ikipe, mu gihe Rashford yavugaga ko imitoreze ya Amorim inaniza abakinnyi, nti natange umusaruro.

Amafoto