FIFA Club World Cup: PSG yanyagiye Inter Miami igera muri ¼

Imikino y'Igikombe cy'Isi cy'ama-Clubs yatangiye kugera mu mahina.

Nyuma y'imikino y'amajonjora, amakipe yatangiye iyo gukuranamo.

Muri iyi mikino iri gukinirwa muri USA, Ikipe ya Inter Miami ya kizigenza Lionel Messi ntabwo yahiriwe.

Kuri iki Cyumweru, yasezerewe n'Ikipe ya Paris Saint Germain yo mu Bufaransa, iyinyagiye ibitego 4-0.

Iyi mvura y'ibitego, yafashije Paris Saint Germain gukatisha itike ya  ¼, mu gihe Inter Milan yatashye amaramasa.

Uyu mukino wakiniwe kuri Mercedes Benz Stadium, wari uhanzwe amaso n'abatari bacye, cyane aba Messi w'Imyaka 38 y'amavuko kuri ubu.

Umunya-Portugal, Joao Neves yagoye cyane Inter Miami, cyane ko yabigaragaje ayitsinda ibitego 2 byinjiye mu gice cye mbere cy'umukino.

Igitego cya mbere yagitsinze ku munota wa 6 w'umukino, yongera kunyeganyeza inshundura ku munota wa 39.

Mbere y'uko amakipe yombi ajya kuruhuka,Tomas Aviles, myugariro wa Inter Miami yitsinze, bishyira akadomo ku nzozi z'iyi kipe yo muri USA, yatekerezaga ko yakwishyura ibitego 2 yari yatsinzwe, kuko byahise biba ibitego 3-0.

Mu gihe Inter Miami yibwiraga ko birangiye, Ashraf Hakim, myugariro w'inyuma ku ruhande rw'iburyo rwa Paris Saint Germain, yatsinze igitego cya 4, ikizere kiba kiyoyotse gutyo.

N'ubwo Inter Miami yasezerewe, ariko amarangamutima yari yose ku ruhande rwa Lionel Messi wari wongeye guhura na Luis Enrique wamutoje muri FC Barcelona.

Aba bombi, mu Mwaka w'imikino w'i 2015-16, batwaranye ibikombe bitatu bikomeye ku Mugabane w'Uburayi.

Ibi byarimo Igikombe cya UEFA Champions League, ndetse Messi anandika amateka yo gutsinda ibitego 91 mu Mwaka w'imikino.

Nyuma yo kuva muri FC Barcelona bitewe n'ubukungu butari bwifashe neza, Messi yerekeje mu Ikipe ya Paris Saint Germain, nabwo ahasanga Luis Enrique wamutoje mu gihe cy'Umwaka umwe, mbere y'uko yerekeza muri USA.

Luis Enrique n'abasore be bafite akazi gakomeye mu mikino ya ¼, kuko bazacakirana n'Ikipe ya Bayern Munich yo mu Budage, yasezereye Flamengo yo muri Brazil iyitsinze ibitego 4-2.