APR yatsinze Patriots imikino 3-2 igera kuri ‘Finale ya Playoffs’

Nyuma yo guhatana mu mikino itanu ya kamarampaka [Playoffs] hagati y'Ikipe y'Ingabo z'u Rwanda [APR BBC] na Patriots BBC, ikibuga cyagaragaje uwigizaga nkana.

Umukino wo kuri iki Cyumweru wakiranuye aya makipe yombi yagiye guhura anganya intsinzi 2-2, warangiye APR BBC iwegukanye ku ntsinzi y'amanota 81-67, ihita inakatisha itike yo kuzakina umukino wa nyuma, yasanzeho Ikipe y'Ikigo cy'Igihugu cy'Ingufu, REG BBC.

Iyi mikino ya kamarampaka, ikinwa n’amakipe yabaye 4 ya mbere mu Mwaka w'imikino usanzwe wa Shampiyona y’ikiciro cya mbere mu Rwanda.

Kuri iyi nshuro, aya makipe yari: APR BBC, REG BBC, Patriots BBC na UGB BBC.

Amategeko ateganya ko Ikipe ya mbere ihura n'iya kane, ibi bikaba byari bivuze ko REG BBC yagombaga kwisobanura na UGB BBC, mu gihe APR BBC yabaye iya kabiri, yikiranuye na Patriots BBC yabaye iya gatatu.

Imikino yo gushaka itike yo kujya kuri finale, yakinwe mu buryo amakipe atanguranwa intsinzi 3 mu mikino 5.

Patriots yayitangiye neza itsinda umukino wa mbere, APR yihagararaho itsinsa uwa kabiri, mu gihe Patriots yahise itsinda uwa gattu.

Ibintu byahindutse mu mikino ibiri ya nyuma ya kamarampaka, kuko yose yegukanywe na APR BBC.

Iyi irimo uwakinwe ku wa tariki ya 27 Kamena [6] 2025 ndetse n'uwo kuri iki Cyumweru.

Mu gihe Patriots BBC na APR BBC zesuranaga, REG BBC yabyiniraga ku rukoma, kuko yasezereye UGB BBC iyitsinze imikino 3-0.

Muri uyu mukino wahuje APR na Patriots, APR BBC yayoboye agace ka mbere n'amanota 24-20, inegukana aka kabiri ku manota 22-17.

Nyuma y'uko amakipe yombi avuye kuruhuka, APR BBC ntiyigeze yorohera Patriots BBC, kuko yanegukanye agace ka gatatu n'amanota 14-13, mu gihe kandi yanegukanye aka kane ku ntsinzi y'amanota 21-17.

Bitandukanye n'uko imikino yo gushaka amakipe azajya ku mukino wa nyuma yagenze, ayawugezeho, azakina imikino 7, iyegukana Igikombe biyisabe gutsindamo 4.

Biteganyijwe ko iyi mikino itangira tariki ya 01 Nyakanga [7] 2025, ikazakinirwa mu Inzu y’Imikino n'Imyidagaduro ya Kigali, izwi nka BK Arena. 

Amafoto