Mbere y’uko umwaka w’imikino w’i 2023/24 utangira, kuri uyu wa Gatanu tariki 30 Kamena 2023, Rayon Sports yakoranye ikiganiro n’itangazamakuru, ikiganiro yamurikiyemo uburyo bwo kugura Itike izafasha abakunzi bayo kuyireba ikina mu mwaka utaha w’imikino.
Iyi tike igabanyije mu byiciro bitatu, yamurikiwe ku Biro by’iyi kipe ku Kimihurura.
Uretse itangazamakuru, yamurikiwe kandi imbere y’abayobozi b’iyi kipe.
Icyiciro cya mbere cy’iyi tike kigizwe n’iyo mu bwoko bw’abanyacyubahiro ba mbere, VVIP A ariyo bise Gold, icyiciro cya 2 ni VVIP B’ ariyo bise Silva naho icyiciro cya 3 ni VIP ariyo yiswe Bronze.
Itike y’icyiciro cya mbere ya VVP ‘A’ yiswe Gold igura Miliyoni 5 z’amanyarwanda aho uzayigura azaba yemerewe ibi bikurikira: Kureba imikino yose; Iyo mu rugo ndetse niyo hanze atishyuye.
Parking y’imodoka ye izandikwaho izina rye, azaherekeza ikipe mu marushanwa Nyafurika ndetse azinjira mu kanama ngishwanama.
Azajya atumirwa mu nama y’inteko rusange, azaba yemerewe kureba imyitozo ya Rayon Sports yose, azajya ahabwa ubutumire bw’abanyacyubahiro mu bikorwa byose bya Rayon Sports, azajya ahabwa amakuru y’ikipe, kujya kwiyakira igice cya mbere kirangiye mu mukino ndetse n’ibindi.
Itike y’icyiciro cya 2 ni VVIP’B’ ariyo yitwa Silva ikaba igura miliyoni 1 y’amanyarwanda.
Uzayigura azaba yemerewe ibi bikurikira: Kureba imikino yose Rayon Sports yakiriye, aho gushyira imodoka (Parking) muri Stade imbere, umwambaro w’ikipe (Home&Away).
Azaba yemerewe guherekeza Rayon Sports mu mikino mpuzamahanga, gutumirwa mu nama y’inteko rusange, kujya kwiyakira igice cya mbere kirangiye, kujya kureba imyitozo yose ya Rayon Sports, azajya ahabwa amakuru y’ikipe, guhabwa ubutumire bw’abanyacyubahiro mu bikorwa byose bya Rayon Sports ndetse n’ibindi.
Itike y’icyiciro cya 3 ni VIP ikaba yariswe Bronze, igura ibihumbi 500 by’amanyarwanda. Uzayigura azaba yemerewe ibi bikurikira: Kureba imikino yose Rayon Sports yakiriye yicaye muri VIP, gufata icyo kurya n’icyo kunywa mu karuhuko (HalfTime) ya buri mukino.
Azajya atumirwa mu bikorwa byose bya Rayon Sports, azahabwa umwambaro umwe w’ikipe azihitiramo, guhabwa amakuru ya Rayon Sports, kureba imyitozo ya Rayon Sports n’ibindi…
Rayon Sports yasoreje ku mwanya wa gatatu muri uyu mwaka w’imikino, gusa yegukanye igikombe cy’Amahoro itsinze APR FC ku mukino wa nyuma wabereye kuri Sitade ya HUYE tariki ya 03 Kamena 2023.
Yaherukaga ku ruhando ny’Afurika mu mwaka w’i 2018, aho yasezerewe mu mikino y’amatsinda.
Gukina imikino y’amatsinda, niyo kipe ya mbere yabikoze kugeza ubu mu mateka ya Ruhago mu Rwanda.
Amafoto
