Icyorezo cya Covid-19 cyadutse ku Isi mu mpera z’Umwaka w’i 2019 gihereye mu Mujyi wa Huan mu Bushinwa cyikoreka imbaga kidasize no kudindiza iterambere ndetse gisiga benshi mu bukene.
Ishami ry’Umuryango w’Abibumbye ryita ku Buzima (OMS) riherutse gutangaza ko iki Cyorezo kitagihangayikishije Isi.
Gusa, nyuma y’ubu butumwa, mu gihugu cya Bangladesh giherereye ku Mugabane wa Aziya habonetse abantu 68 bashya bayanduye mu gihe cy’Umunsi umwe gusa.
Kugeza mu gitondo kuri iki Cyumweru tariki 04 Kamena 2023 niko iyi mibare yari ihagaze.
Ibi byatumye umubare w’abanduye iki Cyorezo muri rusange muri icyo gihugu kuva cyakwanduka uzamuka, ugera kuri 2,039,639.
Mbere yaho hari habonetse abandi 89 banduye Covid-19 mu munsi umwe gusa, ku wa Gatanu tariki 2 Kamena 2023.
Ibyo byatumye ibipimo by’abahitanwe na yo bitumbagira kuko hiyongereyeho abandi bantu babiri, harimo umugabo n’umugore bapfuye mu masaha 24, ubu umubare w’abishwe n’icyo cyorezo muri icyo gihugu muri rusange ukaba ugeze ku bantu 29.448, nk’uko byatangajwe na Guverinoma y’icyo gihugu.
Ni ubwa mbere hongeye kugaragara abantu bandura Covid-19 ndetse n’abicwa na yo muri icyo gihugu mu mezi abiri ashize .
Mu bantu 1.515 bapimwe Covid-19 hirya no hino muri icyo gihugu, abagera kuri 5.87 basanzwe bayanduye.
Akarere ka Dhaka ni ko kagaragayemo abenshi muri abo banduye Covid-19 bashya, mu turere 83 tugize icyo gihugu.
Icyorezo cya Covid-19 cyageze mu bihugu n’Intara bisaga 210 hirya no hino ku Isi, uhereye igihe umuntu wa mbere ufite Covid-19 yagaragariye mu Bushinwa mu Kwezi k’Ukuboza 2019.
Tariki 5 Gicurasi 2023, nibwo Umuyobozi w’Ishami ry’Umuryango w’Abibumbye ryita ku Buzima (WHO/OMS), Tedros Adhanom Ghebreyesus, yatangaje ko hari icyizere gikomeye ko Covid-19, itakiri icyorezo gihangayikishije Isi.