Basketball: APR BBC yatangiranye Intsinzi y'Amateka muri BAL

Ikipe y’Ingabo z’u Rwanda yaraye ikoze amateka yo gutsinda umukino wa mbere mu irushanwa rihuza amakipe y’ibihangange ku Mugabane w’Afurika mu mukino wa Basketball rizwi nka (BAL) Basketball Africa League, nyuma yo gutsinda US Monastir BBC amanota 89-84 mu mukino wakiniwe mu Nyubako y’Imikino n’Imyidagaduro izwi nka Dakar Arena.

N’intsinzi yegukanye biyisabye kwiyuha akuya, kuko byasabye ko amakipe yombi arenza igihe gisanzwe kimenyerewe cy’uduce tune (4) tw’umukino.

Ibifashijwemo n’Umunyamerika, Obadiah Noel, APR BBC yaraye intsinzi Ikipe ya US Monastir yo muri Tuniziya, amanota 89-84, mu mukino ufungura ijonjora ryo gushaka itike yerekeza i Kigali mu mikino ya nyuma, mu makipe yashyizwe mu kerekeza cya Sahara (Sahara Conference).

Ku myaka 24 gusa y’Amavuko, Obadiah Noel, yatsinze amanota 3 ku isegonda rya nyuma ry’agace ka kane, bityo amakipe yombi asoza aka gace anganya amanota 78-78, hahita hitabazwa Iminota 5 ya kamarampaka.

APR BBC yasaga n’iyavuye mu mukino habura Umunota n’igice, yakoze iyo bwabaga yingaranzura US Monastir BBC.

Kwesura US Monastir BBC byafashwe nk’amateka, kuko uretse kuba APR BBC ari ubwa mbere yari ikinye iyi mikino, yahuraga n’ikipe yegukanye iri Rushanwa mu Mwaka w’i 2022 ubwo ryakinwaga ku nshuro ya 2.

Imwe mu ntwaro yafashije Umutoza wa APR BBC, Mazen Trakh, irimo guha ikizere abakinnyi bakiri bato barimo nka Obadiah Noel na Abdullah Ahmed, bafashijwe n’abandi bafite ubunararibonye muri iri rushanwa nka Adonis Filer, Jean Jacque Wilson Nshobozwabyosenumukiza na Dario Hunt.

Amakipe yombi yerekanye umukino ukomeye waranzwe no kuba yakunze kugenda acunganwa ku jisho, kuko yatandukanywaga n’amanota atarenze 2 cyangwa 4 mu mukino hagati.

Ibishimangira uko guhangana, n’uko Agace ka mbere k’umukino karangiye amakipe yombi anganya amanota 20-20, mu gihe utundi dutatu twaranzwe no kurushanwa amanota ari hagati y’abiri n’atanu.

Intwali y’uyu mukino, Obadiah Noel, yatsinze amanota 24 wenyine ku ruhande rwa APR BBC.

Uretse aya manota, Obadiah Noel yakoze Rebounds 2, anatanga Imipira 2 yabyaye amanota.

Abakinnyi kandi barimo Adonis Filer na Axel Mpoyo nabo bagize uruhare rukomeye muri uyu mukino, kuko nka Adonis nawe yatsinze amanota 24 mu gihe Axel yatsinze 15.

Ku ruhande rwa US Monastir BBC, Chris Crawford niwe mukinnyi wahize abandi, atsinda amanora 21, mu gihe Ater Majok yatsinze amanota 12.

Kuri iki Cyumweru, amakipe yombi aragaruka mu Kibuga, APR BBC yesurana na Rivers Hoopers yo muri Nijeriya ku Isaha ya saa 16:30 za Kigali, mu gihe US Monastir BBC yo muri Tuniziya, yisobanura na AS Douanes yo muri Senegal.