Ikipe ya Paris Saint-Germain [PSG] yo mu Bufaransa yemeye igiciro cya Miliyari 390 Frw Al Hilal yo muri Arabie Soudite iri gutanga kuri Kapiteni w’iyi kipe n’y’Igihugu cy’u Bufaransa, Kylian Mbappé, wari usigaje umwaka ku masezerano ye
Mbappé wifuzwaga n’amakipe atandatu akomeye yo ku Mugabane w’u Burayi ari yo Chelsea, Manchester United, Tottenham, Inter Milan na Barcelona amahirwe menshi ni uko yari kuzerekeza muri Real Madrid umwaka utaha w’imikino ku buntu.
Umuyobozi wa Paris Saint Germain, Nasser Al Khelaifi, yatangaje ko uyu musore w’imyaka 24 utarajyanye na bagenzi mu mwiherero mu Buyapani na Koreya y’Epfo kubera gushinjwa imyitwarire mibi, atagendera ubuntu umwaka utaha.
Nyuma yo gutandukana na Messi, PSG yatangaje ko itakomezanya n’abakinnyi batifuza gukinira ikipe.
Umubano hagati ya Mbappé na PSG wajemo agatotsi nyuma y’uko ukwezi gushize yatangaje ko atazongera amasezerano muri iyi kipe.
Ishyirahamwe ry’Abakinnyi babigize Umwuga mu Bufaransa (UNFP) rishinja PSG kudaha agaciro Kylian Mbappé.
Ryagize riti ”Abakinnyi bose bakwiye gukorera mu bwisanzure bungana ndetse mu buryo bwa kinyamwuga kugira ngo batange umusaruro bitezweho.”
Uyu rutahizamu yatanzweho asaga miliyari 226 Frw ubwo yavaga muri AS Monaco yerekeza muri PSG mu 2018 ku myaka 19 gusa.