Ikipe ya Rayon Sports FC yamuritse imyambaro mishya izifashisha mu mikino yakiriye n’iyo hanze mu mwaka wa 2023/2024 yadozwe n’Ikigo Nyarwanda gikora Imideli, Kwesa Collection.
Ku mugoroba wo kuri uyu wa Mbere, tariki ya 24 Nyakanga 2023, ni bwo Murera yagaragaje imyambaro izakoresha ibinyujije ku mbuga nkoranyambaga zayo.
Mu kuwumurika yifashishije ba myugariro bayo barimo Mitima Isaac na Nsabimana Aimable ndetse n’abakobwa b’uburanga.
Mu myambaro yashyizwe hanze harimo iyo gukinana ku mikino yo mu rugo.
Aha izajya yambara ibara ry’ubururu bwiganje ku mipira ifite imirongo y’umweru ku ijosi no ku maboko.
Ku makabutura n’amasogisi naho ni ubururu gusa.
Ku myambaro yo ku mikino yo hanze izajya ikoresha ibara ry’umweru ku makabutura, ku mipira no ku masogisi, ku maboko no ku ijosi hakazaho akarongo k’ubururu.
Iyi myenda yombi iriho ibirango by’abaterankunga b’iyi kipe, aho ku kuboko kw’iburyo hariho icya Kwesa Collection yakoze uyu mwambaro, ibumoso hariho Sosiyete y’Imikino y’Amahirwe ya Choplife, imbere hakajyaho umuterankunga mukuru SKOL ndetse no ku ikabutura hariho Canal Plus.
Iyi myenda yamaze no kugera ku isoko aho umufana n’umukunzi wa Rayon Sports uzajya uyikenera azajya ayigura ku bihumbi 18 Frw ku mwambaro umwe cyangwa 15.000 Frw ku wifuza kurangura 60.
Uyu mwaka w’imikino Rayon Sports yitaye ku birebana n’imyambarire inoze kuko iherutse no gusinyana amasezerano n’Inzu Nyarwanda y’Imideli, F and Y, izajya yambika abayobozi n’abakinnyi b’iyi kipe mu bikorwa birimo ibirori bikuru yateguye no mu gihe yerekeje hanze y’Igihugu.
Rayon Sports iri gutegura umwaka mushya w’imikino wayo uzatangira tariki 5 Kanama 2023 haba ’Rayon Day’ cyangwa ’Umunsi w’Igikundiro’ izerekanirwaho abakinnyi izakoresha, abaterankunga bashya n’imyambaro mishya izifashisha.
Amafoto
