Irushanwa Mpuzamahanga ry’umukino wa Triathlon, IRONMAN RWANDA 70.3 ryabereye mu Karere ka Rubavu mu Mpeshyi y’Umwaka ushize, ryahembwe nk’iryahize ayandi mu bihembo bya Global Choice Awards 2022.
Iri rushanwa ryateguwe na Global Events ku bufatanye n’Impuzamashyirahamwe y’umukino wa Triathlon ku Isi, ryakinwe tariki ya 22 Kanama 2022, ribera mu Karere ka Rubavu ho mu Ntara y’Uburengerazuba bw’Igihugu, aho ryakinwe hakinwa imwe mu ntera ndende zisanzwe zikinwa.
Ku nshuro ya mbere ryari rikiwe mu Rwanda, mu Mazi boze 1,9KM, ku maguru basiganwa 21KM, ku Igare basiganwa 90KM.
Itangazo rigenewe Itangazamakuru ryashyizweho umukono na Paul Atwine, ushinzwe ubucuruzi no kumenyekanisha amakuru muri Global Events, yavuze ko iri rushanwa (Ironman 70.3 Rwanda), ryahize andi 118 yo ku rwego rwa Ironman 70.3 yakinwe mu Mwaka ushize w’i 2022.
Gutoranya irushanwa ryahize ayandi, bikorwa nyuma yo kubaza abakinnyi bitabiriye amarushanwa ya Ironman 70.3 muri uwo Mwaka.
Mu bantu Ibihumbi 65 babajijwe, bemeje ko Irushanwa ryabereye mu Rwanda, ntaryarihize.
Umuyobozi wa Global Events Ishami ry’Afurika, Bonita Mutoni, yashimiye abakinnyi batoye bemeza ko Irushanwa rya Ironman Rwanda 70.3 ariryo ryahize ayandi mu Mwaka ushize.
Bonita Mutoni yagize ati:
Iki gihembo ngituye abagize uruhare bose mu mitegurire n’imigendekere myiza ya IRONMAN RWANDA 70.3.
Ibi birakomeza gushyira u Rwanda ku mwanya wo kwakwira Amarushanwa yo ku rwego mpuzamahanga ndetse no kumenyekanisha Igihugu binyuze muri gahunda ya VISIT RWANDA.
Amakuru yizewe THEUPDATE ifite ni uko irushanwa rya IRONMAN 70.3 rikurikirwa na Miliyoni 21 ku Isi, ibi bikaba birishyira mu mwanya mwiza wo kwigarurira Siporo ishingiye ku Bukerarugendo mu Rwanda.
Biteganyijwe ko Irushanwa rya IRONMAN RWANDA 70.3 muri uyu Mwaka (2023), rizakinwa muri Kanama tariki ya 05.
Iri Rushanwa rikaba rikinwa hakinwa Imikino itatu (3), irimo; Gusiganwa ku Magare, kwiruka ku Maguru no Koga.
