“Dufunguye Konteri yo kwegukana Ibikombe” – Bruno Fernandes nyuma y’uko Manchester United yegukanye Carabao Cup 


image_pdfimage_print

Umukinnyi wo hagati wa Manchester United Bruno Fernandes avuga ko bashaka kandi bacyeneye ibindi bikombe, nyuma yuko begukanye igikombe cya Carabao batsinze Newcastle United ku mukino wa nyuma.

Ibitego bibiri byo mu gice cya mbere, icy’Umunya-Brazil Casemiro ukina hagati n’icyo myugariro w’Umuholandi Sven Botman wa Newcastle yitsinze, byahesheje Manchester United igikombe cya mbere mu myaka itandatu ishize.

Nyuma y’iyo ntsinzi y’ibitego 2-0 ku kibuga cya Wembley, Fernandes yabwiye Sky Sports ati: “Tumaze igihe dushakisha iki gihe.

“Ubu ndanyuzwe kuko mbonye igikombe cyanjye ariko ndasha ibindi”.

Uyu Munya-Portugal w’imyaka 28 yongeyeho ati: “Ni igikombe cya mbere cyo mu mwaka w’imikino ariko turashaka ibindi kandi ducyeneye ibindi. Iki ntigihagije kuri iyi kipe”.

Iyo ntsinzi yo ku cyumweru ya Manchester United ibaye inshuro ya mbere iyi kipe yegukanye igikombe kuva mu mwaka w’imikino wa 2016-2017, ubwo yatsindiraga igikombe cya Carabao n’igikombe cya Europa League itozwa na Jose Mourinho.

Muri uyu mwaka w’imikino, Manchester United iracyahatanira ibindi bikombe mu Bwongereza no ku rwego rw’Uburayi.

Iyi kipe itozwa n’Umuholandi Erik ten Hag, mu cyumweru gishize yatsinze Barcelona igera muri kimwe cy’umunani cya Europa League, mu gihe ku wa gatatu w’iki cyumweru, iwayo kuri Old Trafford, izakina na West Ham United mu cyiciro cya gatanu cy’igikombe cya FA.

Manchester United iri ku mwanya wa gatatu ku rutonde rw’agateganyo rwa shampiyona, ikaba irushwa amanota umunani na Arsenal iri ku mwanya wa mbere, mu gihe hasigaye imikino 14.

Ten Hag, wahuye n’uwahoze ari umutoza wa United Sir Alex Ferguson nyuma y’uyo mukino, yabwiye BBC Radio 5 Live: “Ni byiza cyane kuba yari ari hano ngo ampe ikaze.

“Yishimiye cyane ikipe. Ni intangarugero cyane ku byo yakoranye n’ikipe ndetse ni intangarugero ku buryo bwo gutsindira ibikombe.

“Umupira w’amaguru nta kindi kitari ugutsinda kandi ibyo yarabyerekanye inshuro nyinshi cyane. Ubu mu ikipe hameze neza. Ibi bizatuzanira icyizere, ariko tugomba kugiharanira… Nitubigenza gutyo birashoboka ko tuzagera ku ntego.

“Turacyari mu ntangiriro yo gusubiza Manchester United aho ikwiye kuba iri, kandi aho ni ukuba itsindira ibikombe. Iki ni icya mbere”.

Bruno Fernandes (wa kabiri uvuye ibumoso) avuga ko bashaka ibindi bikombe

 

Ten Hag (wa kane uvuye ibumoso) bimufashe igihe kitageze ku mwaka umwe w’imikino kugira ngo asoze ukubura ibikombe kwa Manchester United.

Leave a Reply

Your email address will not be published. Required fields are marked *