Ikipe ihagarariye u Rwanda mu mikino ya Basketball Africa League (BAL), REG BBC, yongeye kwisanga mu itsinda rimwe na US-Monastir yo mu gihugu cya Tuniziya yatwaye igikombe cy’umwaka ushize (2022), nyuma ya tombora yasize izi kipe zombi hamwe n’izindi 4 zizahatana mu itsinda ryiswe Sahara Conference, mu mikino iteganyijwe kubera i Dakar mu gihugu cya Sebegal guhera tariki ya 11 kugeza ku ya 21 Werurwe 2023.
Uretse REG BBC na US-Monastir, andi makipe azakina Sahara Conference arimo; Kwara Falcons (Nigeria), Abidjan Basket Club (Côte d’Ivoire) AS Douanes (Senegal) na Stade Malien (Mali).
Ni mu gihe andi makipe 6 yashyizwe mu itsinda ryiswe Nile Conference rizakinira mu gihugu cya Misiri muri Arena (Ikibuga) Hassan Mostafa Indoor Sports Complex iri mu Mujyi wa Cairo guhera tariki ya 26 kugeza ku ya 06 Gicurasi 2023.
Iri tsinda ryiswe Nile Conference, rigizwe n’amakipe arimo; Al Ahly yo muri Misiri (Egypt) izanakira iyi mikino, Cape Town Tigers (South Africa), Petro de Luanda (Angola) yatsindiwe ku mukino wa nyuma mu Mwaka ushize w’i 2022, City Oilers (Uganda), Ferroviario da Beira (Mozambique) na Seydou Legacy Athlétique Club (Guinea).
Amakipe 4 azaba aya mbere muri buri tsinda, azahurira i Kigali mu mikino ya nyuma itegerejwe hagati ya tariki 21 na 27 Gicurasi 2023 mu mikino izakinirwa muri BK Arena.
Iyi mikino, izajya mu buryo bw’umukino umwe gusa. Ni ukuvuga, amakipe azatomborana, ikipe itsinzwe ihite isezererwa.
Agaruka kuri iyi mikino y’amajonjora, umuyobozi wa BAL, Umunyasenegal Amadou Gallo Fall, yatangaje ko uyu mwaka izaba ikomeye, aho buri kipe muri aya 12 yahigiye kuzaboneka mu makipe 8 azisanga i Kigali.
Ati: Guhera mu Kwezi gutaha (Werurwe), abakunzi b’uyu mukino bazanyurwa n’imikino y’amajonjora izabera i Dakar. Kandi ndabizeza ko bazabona imikino iri ku rwego rwo hejuru nk’ibyo bafatiraho ikitegererezo muri Basketball y’Isi (NBA).
Ni imikino izaryohera abazayireba, yaba muri Afurika ndetse no ku Isi muri rusange.
Amakipe yo mu bihugu bya; Angola, Egypt, Nigeria, Rwanda, Senegal, na Tunisia yitabiriye iyi mikino (BAL 2023), abikesheje gutwara ibikombe bya Shampiyona mu bihugu byayo.
Andi makipe 6 asigaye, ni ukuvuga ayo mu bihugu bya; Côte d’Ivoire, Guinea, Mali, Mozambique, South Africa na Uganda, yabonye iyi tike abikesheje amajonjora yakinwe mu Kwakira (10) n’Ugushyingo (11) k’Umwaka ushize (2022).
Twibutse ko tariki ya 28 Gicurasi (5) umwaka ushize (2022), US-Monastir yegukanye iri rushanwa itsinze Petro de Luanda ku mukino wa nyuma wabereye muri BK Arena imbere y’abafana 10,000.