Ikipe y’Igihugu y’u Rwanda yasoje imikino ya nyuma y’igikombe cy’Afurika kiri gukinirwa i Cairo mu Misiri ku nshuro ya 24 iri ku mwanya wa Gatandatu (6) nyuma yo gutsindwa na Tuniziya mu mukino wo guhatanira umwanya wa Gatanu (5).
Uyu mukino Tuniziya yawutsinze ku ntsinzi y’amaseti atatu ku busa (3-0) 25-17, 25-18 and 25-21.
N’ubwo muri uyu mukino u Rwanda ntako rutari rwagize, mu iseti ya gatatu ari nayo yari iya nyuma y’umukino, abasore b’Umutoza Paulo De Tarso bagaragaje imbaraga nke z’umubiri, ibi byoroheye Tuniziya kuyegukana byihuse.
Uyu mwanya wa Gatandatu Rwanda rwegukanye, ni umwanya rumaze igihe rutabasha kurenga, kuko no mu mikino nk’iyi yakinwe mu 2015, 2017 n’i 2021 nabwo ariwo rwari rwasorejeho.
Nyuma yo gusoza imikino yo guhatanira imyanya, kuri uyu wa Gatatu tariki ya 13 Nzeri 2023, ruraza kwambikana hagati ya Misiri yakiriye iyi mikino, na mukeba wayo w’ibihe byose Algeria, mu mukino wa nyuma.
Zombi zageze ku mukino wa nyuma bizisabye kwiyuha akuya, kuko Misiri yakuyemo Kameroni ku ntsinzi y’amaseti 3-1 (25-13, 25-23, 35-33 , 29-27), mu gihe Algeria yasezereye Libya ku maseti 3-2 (18-25, 25-15 3, 33-35, 25-22 5, 15-11).
Uretse Misiri na Algeria zizakina umukino wa nyuma, Kameroni na Libya nazo zizisobanura mu mukino w’umwanya wa gatatu.
Iyi mikino iri kubera mu Misiri, izanatanga itike y’Imikino Olmepike izabera mu Bufaransa mu Mpeshyi y’Umwaka utaha w’i 2024.
Mu Mwaka w’i 2021 ubwo iyi mikino yakinirwaga mu Rwanda ku nshuro ya 23, Tuniziya yegukanye igikombe, mu gihe u Rwanda rwabaye urwa gatandatu nyuma yo gutsindwa na Uganda mu mukino wo guhatanira umwanya wa gatanu.
Amafoto
