Mu gihe kuri uyu wa Kabiri tariki ya 14 Ugushyingo 2023 i Kigali mu Rwanda hatangiraga Imikino y’Irushanwa rihuza amakipe agize Akarere ka 5 k’Umukino wa Volleyabll, amakipe ahagarariye u Rwanda muri iyi mikino yahacanye Umucyo.
Aya makipe yaserukanye ishema arimo amakipe yombi ya Polisi y’Igihugu (Abagabo n’Abagore), Ikipe y’Ikigo k’Igihugu k’Ingufu n’Ikipe y’Ikigo k’Igihugu k’Imisoro n’Amahoro.
Mu kiciro cy’Abagore, Ikipe y’Ikigo k’Igihugu k’Imisoro n’Amahoro (RRA WVB) yisengereye iy’Ingabo z’Igihugu (APR WVC) ku ntsinzi y’amaseti 3-0 (25-15, 25-20, 25-19), ibi ni nabyo Ikipe ya Polisi y’Igihugu (Police WVC) yakoreye Ikipe y’Umujyi wa Kampala muri Uganda (KCCA WVC) (26-24, 25-18, 25-15).
Ku ruhande rw’abagabo, Ikipe ya Polisi y’Igihugu (Police VC), yihereranye Kaminuza ya Kepler ikipe nshya muri Volleyball yo mu Rwanda, iyitsinda Amaseti 3-1 (25-19, 20-25, 25-19, 25-21), mu gihe Ikipe y’Ikigo k’Igihugu k’Ingufu (REG VC), yisengereye Amicale de Bujumbura yo mu Burundi Amaseti 3-0 (25-18, 25-17, 25-15).
Nyuma y’iyi mikino yo kuri uyu wa Kabiri, uyu wa Gatatu harakinwa imikino y’Umunsi wa Kabiri, aho Ikipe y’Ingabo z’Igihugu mu Bagabo (APR VC) itangira urugamba rwo gushaka iki gikombe icakirana na Amicale de Bujumbura iri gutozwa na Kiramira Faustin uzwi nka Doto.
Mu kiciro cy’Abagore, Ikipe y’Ikigo k’Imisoro n’Amahoro iraza kuruhuka mu gihe Papeline yo muri Kenya iza gukina umukino wayo wa mbere.
Iyi mikino ihuza amakipe yo mu bihugu bya Afurika y’Iburasirazuba no Hagati, yaherukaga gukinwa mu 2019 ubwo yakinirwaga i Kigali.
Icyo gihe, yegukanywe n’ikipe ya Gisagara VC itsinze REG VC zombi zo mu Rwanda, ku ntsinzi y’Amaseti 3-1 mu mukino wabereye muri Sitade Nto y’Amahoro i Remera. Gusa, kuri ubu, Gisagara VC ntabwo yitabiriye.
Kuva mu 2019, iyi mikino yari itarongera gukinwa kubera gukomwa mu Nkokora n’Icyorezo cya Covid-19.
Twibutse ko iyi mikino yatangiye kuri uyu wa Kabiri tariki ya 14 Ugushyingo 2023, izasozwa ku Cyumweru tariki ya 19 Ugushyingo 2023, ikaba iri gukinirwa mu Nzu y’Imikino n’Imyidagaduro izwi nka BK-Arena yubatse i Remera mu Mujyi wa Kigali.
Imikino iteganyijwe uyu munsi
Amafoto
