UEFA Champions League: Real Madrid yaraye inyagiriye Liverpool mu rugo ibitego 2-5, menya ibyasizwe n’uyu mukino waciye agahigo


image_pdfimage_print

Mu ijoro ryakeye hakinwaga imikino ya 1/8 cy’imikino ihuza amakipe yahize ayandi ku Mugabane w’Uburayi, imikino izwi ku izina rya UEFA Champions League.

N’ubwo Frankfort yari yakiriye Naples mu Budage, ariko amaso yose yari ahanze mu Bwongereza kuri Sitade ya Anfield mu mukino Liverpool yari yakiriyemo Real Madrid.

Uyu mukino wari uraje inshinga abatari bacye, kuko hari hashize amezi 7 gusa aya makipe yombi ahuriye mu Bufaransa ku mukino wa nyuma w’iri rushanwa mu mwaka w’imikino 2021/22, umukino Liverpool yatsinzwemo na Real Madrid igitego 1-0 cyatsinzwe na Vinicius Junior.

Abakunzi ba Liverpool bafata uyu mukino nk’igihe kiza cyo kwihimura, ibi byanagaragaraga nk’ibigiye gukorwa, kuko iminota 15 ya mbere y’umukino Liverpool yari imaze gukora iby’abakunzi bayo bayisabaga, inyeganyeza inshundura ubugira kabiri (2-0) mu gihe Real Madrid amaso yarebaga mu kirere.

Ibi bitego bya Liverpool byatsinzwe na Darwin Nunez ku munota wa 4 gusa w’umukino ku mupira yahawe na Mohamed Salah, mu gihe ku wa 14, Salah nawe yaje gutsinda ku makosa y’Umunyezamu wa Real Madrid, Thibaut Courtois.

Gusa, ibi ntabwo byayihiriye kuko yaje kugwirwa n’imvura y’ibitego bya Real Madrid, birimo bibiri byatsinzwe na Vinicius Junior (21’&36′), bibiri bya Benzema (55’&67′) n’icya Eder Militao ku munota wa 47′.

Nyuma y’uyu mukino, iyi ntsinzwi ya Liverpool imbere ya Real Madrid yanditse amateka

  • Real Madrid yabaye ikipe ya mbere yinjije ibitego 4 kuzamura mu izamu rya Liverpool kuri Sitade ya Anfield mu mikino ya UEFA Champions League.
  • Uretse Didier Drogba na Karim Benzema, nta wundi mukinnyi uratsinda ibitego byinshi (6) Liverpool mu mikino yo ku Mugabane w’i Burayi.
  • Vinicius Junior yakoze agahigo kari gafitwe na Johan Cruff, ko kuba ariwe mukinnyi ukiri muto utsinze ibitego 2 Anfield adakinira Liverpool mu marushanwa yo ku Mugabane w’i Burayi.
  • Karim Benzema yakoze agahigo ko gutsinda n’ibura igitego muri sezo (Season) 18 za UEFA Champions League yikurikiranya, agahigo anganya na Lionel Messi.
  • Real Madrid yabaye ikipe ya mbere ibashije gutsinda umukino wa UEFA Champions League ku kinyuranyo k’ibitego 3 mu gihe yari yabanjwe ibitego 2.

Uretse uyu mukino kandi, Naples yasanze Eintracht Frankfort mu Budage iyitsindirayo ibitego 2 ku 0 byatsinzwe na Victor Osimhen ku munota wa 40′, Giovanni Di Lorenzo ku munota wa 65′, mu gihe Khvicha Kvaratskhelia yahushije penaliti ku munota wa 36 w’umukino.


Leave a Reply

Your email address will not be published. Required fields are marked *