Impuzamashyirahamwe y’Umupira w’Amaguru muri Afurika y’Iburasirazuba no Hagati (CECAFA) yatangaje ko CECAFA Kagame Cup igiye gusubukurwa nyuma y’imyaka ibiri aho biteganyijwe ko izabera muri Tanzania ku wa 20 Nyakanga-4 Kanama 2024.
Iri rushanwa rizitabirwa n’amakipe 12 yatwaye ibikombe mu bihugu binyamuryango cya CECAFA, aziyongeraho andi ane azatumirwa.
Umuyobozi Nshingwabikorwa wa CECAFA, John Auka Gecheo, yatangaje ko bishimiye ko iri rushanwa rigiye kongera kuba nyuma y’imyaka ibiri.
Yakomeje ati:“Rizaha n’amakipe azakina Champions League, CAF Confederation Cup na shampiyona zo mu bihugu urubuga rwo kwitegura umwaka w’imikino wa 2024/2025.’’
Muri Mata 2023, CECAFA yari yatangaje ko CECAFA Kagame Cup izakirwa na Sudani tariki ya 15-29 Nyakanga 2023, ariko iri rushanwa ryasubitswe kubera andi marushanwa menshi ya CAF na FIFA yari ateganyijwe.
CECAFA Kagame Cup iheruka yabereye i Dar es Salaam muri Tanzania mu 2021, icyo gihe yegukanwe na Express yo muri Uganda itsinze Nyasa Big Bullets FC yo muri Malawi [yari umutumirwa] igitego 1-0.
Iri rushanwa rizaba nyuma y’iminsi itandatu hasojwe CECAFA Senior Challenge Cup, ihuza ibihugu byo mu Karere, iteganyijwe ku wa 29 Kamena-14 Nyakanga 2024.
CECAFA Senior Challenge Cup yaherukaga kubera muri Uganda mu 2019.
