Nyuma y’uko Umuherwe w’Umunyamerika, Todd Boehly aguriye Chelsea ikina shampiyona y’u Bwongereza miliyari 4.25 z’amayero mu mpeshyi y’umwaka ushize, yatangiye gukunda umupira w’amaguru cyane kugeza naho muri iki gihe ashaka kugura indi kipe muri shampiyona y’u Bufaransa.
Ikipe ya Chelsea kuva igifitwe na Roman Ibrahmovic yimakaje umuco wo kugura abakinnyi benshi kandi bakomeye. Byakomeje na Todd Boehly wasimbuye uyu mugabo nawe yakomereje muri uyu murongo wo kugura buri mukinnyi ukomeye uri ku isoko.
Mu mwaka umwe gusa ikipe ya Chelsea imaze gutanga arenga miliyoni 600 z’amayero ku isoko ry’abakinnyi n’ubwo ntacyo bitanga kuko kugeza ubu iyi kipe iri ku mwanya wa 10 muri shampiyona y’u Bwongereza.
Uku kuryoherwa n’umupira w’amaguru ntabwo birangirira mu kugura abakinnyi. Iyi kipe y’i London mu Bwongereza ishaka kugura ikipe yo muri shampiyona y’u Bufaransa ya Ligue 1 yitwa Strasbourg.
Uyu muherwe w’umunya-America, Todd Boehly na bagenzi be baherutse guhura na Perezida wa Strasbourg ukomoka mu Bufaransa ari we Marc Keller baganira ku kuba bayigura nk’uko ikinyamakuru L’Equipe dukesha iyi nkuru kibuvuga.
