Amashyaka atavuga rumwe n’Ubutegetsi mu gihugu cya Nijeriya yatangaje ko Amatora yakozwe ku wa Gatandatu ushize akojeje isoni ndetse ko nta gaciro akwiriye guhabwa.
Batangaje ibi ubwo bari mu myigaragambyo yo kuyamagana, imyigaragambyo yakorewe ku Murwa mukuru w’iki gihugu, Abuja.
Abantu hafi 100, bagizwe ahanini n’abagore n’urubyiruko, nibo bari bitabiriye iyi myigaragambyo.
Abashinzwe umutekano babakomye mu nkokora, bashyira za Bariyeri mu Mihanda mu rwego rwo kubabuza kugera ahari ibiro bya Komisiyo ishinzwe amatora muri iki gihugu.
Kugera ku Mugoroba wo kuri uyu wa Kabiri ubwo Ukwezi kwa Kabiri kwashyirwagaho akadomo, Komisiyo y’amatora muri Nijeriya yari imaze gutangaza amajwi angana na 2/3 by’abayitabiriye muri za Leta 36.
Nyuma, nibwo byemejwe ko Umukandida w’Ishyaka riri ku Butegetsi, All Progressives Congress (APC), Bola Ahmed Tinubu, ariwe watorewe kuba Umukuru w’Igihugu, n’amajwi arenga Miliyoni 7 z’abatoye.
Tinubu yakurikiwe na Atiku Abubakar wo mu Ishyaka, The People’s Democratic Party, wagize amajwi arenga Miriyoni 6.
Ku mwanya wa gatatu, haje Peter Obi wo mu Ishyaka ry’abakozi, Labor Party, n’amajwi arenga Miriyoni 5.
Gusa, biteganyijwe ko imibare ntakuka yavuye mu matora y’Umukuru w’Igihugu n’ay’Abadepite izatangazwa nyuma y’iminsi ibiri.
Mu gihe imibare ikomeza gutangazwa, abahanga muri Politike ya Nijeriya batangaje ko imvururu zishobora gukomeza kiyongera muri iki gihugu. (VOA)
