Messi yatowe nk’umukinnyi mwiza w’Umwaka 2022 wa FIFA, Argentine yigwizaho ibihembo


Lionel Messi yaraye atorewe kuba ariwe mukinnyi mwiza wa FIFA w’umwaka ushize w’i 2022.

Rutahizamu w’Ikipe y’Igihugu ya Argentina na Paris Saint-Germain, Lionel Messi, yaraye atowe nk’umukinnyi mwiza wa FIFA mu 2022 mu kiciro cy’abagabo.

Uyu rutahizamu w’imyaka 35, yatsinze ba rutahizamu babiri b’Abafaransa, Kylian Mbappe na Karim Benzema.

Messi ni we wari kizigenza mu Ikipe y’Igihugu ya Argentina yegukanye Igikombe cy’Isi cyabereye muri Qatar mu Mwaka ushize w’i 2022, ibi bikaba byiyongeraho kuba yaratsindiye Paris Saint Germain ibitego 27 mu mikino 49 yayikiniye mu Mwaka w’imikino 2021/22.

Uretse Messi, Alexia Putellas ukinira FC Barcelona yatowe nk’uwahize abandi mu kiciro cy’abagore.

Nyuma yo kwegukana iki gihembo ku nshuro ye ya kabiri, Messi, yagize ati:

Birandenze. Uyu Mwaka w’imikino wabaye Umwaka udasanzwe, ibi ni ibihe bitazibagirana kuri njye kuba mbashije kwegukana iki gihembo. Iyo hataba abakinnyi twakinanye bamfashije, ntabwo nari kuba ndi hano.

Njyeze ku nzozi narotaga. Ni abantu bacye cyane bashobora kugera ku ntambwe nk’iyi, kuri njye navuga ko ari umugisha nagirirwe.

Muri ibi birori byabereye i Paris, Lionel Scaloni, utoza Ikipe y’Igihugu ya Argentine yahembwe nk’umutoza w’Umwaka mu kiciro cy’abagabo.

Scaloni yatsinze Pep Guardiola utoza Manchester City wayifashije kwegukana Shampiyona y’Ubwongereza ku nshuro ya gatandatu, ndetse na Carlo Ancelotti wa Real Madrid, wayifashije kwegukana igikombe cya Ligue des champions/Champions League.

Umutoza w’Ikipe y’Igihugu y’Ubwongereza y’abagore, Sarina Wiegman, yahembwe nk’uwahize abandi muri iki kiciro nyuma yo gufasha iyi kipe izwi nka Lionesses kwegukana igikombe cy’u Burayi (European Championship).

Umunyezamu wa Aston Villa n’Ikipe y’Igihugu ya Argentine, Emiliano Martinez, yahembwe nk’uwahize abandi mu bagabo, mu gihe mu bagore iki gihembo cyatwawe n’Umwongerezakazi, Mary Earps.

Martinez w’imyaka 30, yafashije igihugu cye kwegukana Igikombe cy’Isi akuramo za Penaliti enye zose, zirimo 2 z’Abafaransa zo ku mukino wa nyuma.

Earps ukinira Manchester United y’abagore Women’s Super League, yatangiye mu kibuga mu mikino itandatu yose z’Ubwongereza muri Euro 2022 ubwo bayegukanaga.

Cumi n’umwe batowe nk’abakinnyi beza b’Isi yose ku ruhande rw’abagabo:

Thibaut Courtois; Achraf Hakimi, Virgil van Dijk, Joao Cancelo; Kevin De Bruyne, Luka Modric, Casemiro; Lionel Messi, Erling Haaland, Karim Benzema, Kylian Mbappe.

Cumi n’umwe b’umurwi w’isi yose wa Fifpro (Fédération Internationale des Associations de Footballeurs Professionnels) ku ruhande rw’abagabo

 

Image
Mu muhango wo guhemba abhize abandi mu 2022, FIFA yageneye igihembo kidanzwe Pele watabarutse mu Mwaka ushize

 

Image
Abahize abanddi muri buri kiciro mu Mwaka ushize w’Imikino baraye babihembewe na FIFA mu birori byabereye i Paris mu Bufaransa.

 

Image


Leave a Reply

Your email address will not be published. Required fields are marked *