Basketball: REG BBC yabonye umutoza uzayitoza mu marushanwa na BAL


image_pdfimage_print

Umunyamerika Dean Murray yamaze kwemera akazi ko kuzatoza ikipe ya REG Basketball mu marushanwa ya BAL (Basketball Africa League 2023).

Murray yahawe akazi na REG BBC nyuma yo kwegura kwa Henry Mwinuka wasezeye kuri iyi Kipe muri Mutarama uyu Mwaka 2023, amaze kuyihesha Igikombe cya Shampiyona.

Uyu mutoza ‘Murray’ ntabwo ari mushya muri Basketball y’u Rwanda, kuko yatoje Patriots BBC ayihesha igikombe cya 3 cya Shampiyona yatwaye yikurikiranya, igikombe yegukanye mu Kwakira 2020, ubwo yanakatishaga itike yo kwitabira Basketball Africa League (BAL) yakinwe ku nshuro ya mbere mu 2021.

Gusa, ntabwo yakomezanyije na Patriots BBC muri iri rushanwa (BAL), kuko yeguye muri Werurwe 2021, habura amezi 2 gusa ngo iri rushanwa ritangire, kuko ryakinwe muri Gicurasi 2021.

Uyu mutoza yahawe akazi na REG BBC, imukuye muri Saitama Broncos yo mu kiciro cya mbere muri Shampiyona y’Ubuyapani (Japanese Basketball Japan League).

Yagaragaye mu Mujyi wa Kigali kuri iki Cyumweru tariki ya 12 Gashyantare ari hamwe na Adonis Filer ukinira REG BCC, mu mukino wa Shampiyona wahuye iyi kipe na Espoir BBC muri Gymnasium ya Lycee de Kigali. Gusa Adonis Filer ntabwo yawukinnye.

Nyuma y’uyu mukino, nibwo byatangajwe ko yamaze kwemeranya na REG BBC kuzayitoza muri iyi mikino ya BAL 2023.

Ni mu gihe biteganyijwe ko iri rushanwa (BAL 2023), ritangira mu Kwezi gutaha (Werurwe) mu Mujyi wa Dakar muri Senegal guhera tariki ya 11 kugeza ku ya 21.

Ni mu gihe kugeza ubu, REG BBC ikomeje urugendo rwo kudatsindwa muri Shampiyona 2022/23, ibi ikaba yabigezeho kuri iki Cyumweru nyuma yo gutsinda Espoir BBC amanota 76 kuri 70, ibifashijwemo na Pitchou Manga watsinze amanota 17 wenyine muri uyu mukino.

Nyuma y’uyu mukino, Patriots BBC yari yatsinze APR BBC ku wa Gatandatu, iracyari ku mwanya wa mbere (1) n’amanota 17 mu gihe ikurikiwe na REG BBC n’amanota 16, gusa REG BBC ikaba igifite umukino w’ikirarane. Umwaya wa gatatu (3) ufitwe na APR BBC n’amanota 13.

Umutoza Murray na Adonis bakurikiye umukino wa Shampiyona REG BBC yatsinzemo Epoir BBC kuri iki Cyumweru.

 

IBL 2022: Dean Murray Dipecat dari Kursi Pelatih DNA Bima Perkasa Jogja


Leave a Reply

Your email address will not be published. Required fields are marked *