Amakipe y’Ingabo z’u Rwanda “APR BBC na APR WBBC”, yaraye yegukanye Irushanwa ryo kwibuka ku nshuro ya 30 Jenoside yakorewe Abatutsi mu Rwanda mu 1994.
Mu kiciro cy’abagabo, APR BBC yatsinze Patriots BBC amanota 80-63, mu gihe mu bagore, APR WBBC yatsinze REG WBBC amanota 86-81 harinze kwitabazwa Iminota 5 ya kamarampaka.
Iri Rushanwa ry’iminsi ibiri, ryakinirwaga mu Nzu y’Imikino n’Imyidagaduro izwi nka BK-Arena yubatse i Remera mu Mujyi wa Kigali.
Congratulations one more time to @APRBBC_Official 👏 https://t.co/ONTlP9Ssok pic.twitter.com/BBNzE6yf6Z
— FERWABA 🏀🇷🇼 (@ferwabaRW) April 20, 2024
Mu kiciro cy’abagabo, APR BBC yari yasezereye REG BBC muri 1/2, mu gihe Patriots BBC yari yakuyemo Tigers BBC.
Ku ruhande rwa APR BBC, Umutoza Mazen Trakh yaje muri uyu mukino ashaka kwihimura kuri Henry Mwinuka wari wamukoze mu jisho mu mukino wa Shampiyona, birangira binamuhiriye.
APR BBC yayoboye uyu mukino mu duce tubiri twa mbere, aka mbere igatsinda ku manota 25-17, aka kabiri igatsinda ku manota 19-12, bityo amakipe yombi ajya mu karuhuko k’iminota 15, APR BBC ifite amanota 44-29 ya Patriots BBC.
Amakipe yombi yagarutse mu gace ka gatatu yahinduye byinshi, gusa APR BBC ikomeza kwerekana ko yari iri hejuru ya Patriots BBC, kuko n’aka gace yakegukanye mu manota 18-14.
Agace ka nyuma katangiye Patriots BBC igaragaza ko ishaka guhindukirana APR BBC, gusa ntabwo byaje kuyihira kuko amanota 20-18 yatsinze ntabwo yayihesheje kwegukana iri Rushanwa.
Ku ruhande rwa APR BBC, Abakinnyi na Noel Obadiah na Zion Styles bagoye cyane ikipe ya Patriots BBC.
Noel Obadiah yatsinze amanota 13, akora na Rebounds 3, mu gihe Zion Styles yatsinze nawe amanota 13 na Rebounds 2.
Mu gihe ku ruhande rwa Patriots BBC, Olivier Turatsinze ariwe wahize abandi bakinnyi n’amanota 21.
Uretse Turatsinze, Dieudonné Ndizeye nawe yafashije iyi kipe, ayitsindira amanota 14.
Mu kiciro cy’abagore, APR WBBC yegukanye iri rushanwa itsinze Ikipe y’Ikigo k’Igihugu k’Ingufu (REG) REG WBBC, amanota 86-81 (23-14,22-22,18-16,9-29 & 14-9).
Muri uyu mukino, Sandra Kantore wa APR WBBC niwe watsinzemo amanota menshi, kuko yinjije amanota 19 wenyine.
THE LIONESSES, THE CHAMPIONS 🏆👏! #VoicesOfResilience #ResilienceThroughSports#Kwibuka30 #GMT30 pic.twitter.com/n8w2n0q0r8
— FERWABA 🏀🇷🇼 (@ferwabaRW) April 20, 2024
Uretse amakipe yegukanye Igikombe, Umwanya wa gatatu mu bagabo wegukanywe na REG BBC itsinze Tigers BBC amanota 94-92 mu mukino wari ishiraniro, mu gihe mu bagore wegukanywe n’Ikipe ya Kaminuza ka Kepler itsinze GS Marie Reine amanota 76-64.
Irushanwa ryo kwibuka Jenoside yakorewe Abatutsi, ritegurwa mu rwego rwo kwibuka abahoza ari abakinnyi, abayobozi, abakunzi ndetse n’abandi bari bafite aho bahuriye n’umukino wa Basketball mu Rwanda.
Uretse ibi kandi, hanibukwa Abatutsi abasaga 1,000,000 bishwe muri Jenoside yakorewe Abatutsi mu 1994 mu gihe cy’Iminsi 100.
Imwe mu makipe yashegeshwe cyane na Jenoside yakorewe Abatutsi, n’ikipe ya Espoir BBC.
Amafoto
