BAL 2023: Al Ahly yatsinze Ferroviário da Beira mu mukino ufungura Nile Conference


image_pdfimage_print

Ku mugoroba wo kuri uyu wa Gatatu, ki Cairo ku Murwa mukuru w’Igihugu cya Misiri haraye hatangiye imikino yo gushaka itike yo kuzakina imikino ya nyuma ya Basketball Africa League (BAL) izabera i Kigali mu Kwezi gutaha, mu makipe yashyizwe mu itsinda ryiswe Nile Conference.

Umukino ufungura, waraye uhuje imwe mu makipe y’ubukombe muri Misiri no kuri uyu Mugabane, Aly Ahly na Clube Ferroviário da Beira yo muri Mozambique, umukino wabereye mu Nzu y’Imikino ya Hassan Mostafa Indoor Sports Complex.

Uyu mukino warangiye Al Ahly iwegukanye ku manota 92 kuri 74.

Agace ka mbere Aly Ahly yagatsinzemo amanota 32 kuri 15 ya Ferroviário da Beira, aka kabiri igatsinda ku manota 21 kuri 19, aka gatatu kegukanwa na Ferroviário da Beira ku manota 24 kuri 23 ya Al Ahly, mu gihe agace ka kane amakipe yombi yanganyije amanota 16.

Iyi mikino yo mu itsinda ryiswe Nile Conference, yitabiriwe n’amakipe arimo; Al Ahly, Ferroviário da Beira (Mozambique), Cape Town Tigers (South Africa), City Oilers (Uganda), Petro de Luanda (Angola) na Seydou Legacy Athletique Club (SLAC) yo muri Guinea.

Aya makipe uko ari atandatu, azashaka amakipe 4, mu gihe cy’iminsi 10. Bivuze ko tariki ya 06 Gicurasi iyi mikino izaba irangiye. Mu gihe buri kipe izahura n’indi, hagakinwa imikino 15 yose hamwe.


Leave a Reply

Your email address will not be published. Required fields are marked *