Guhera kuri uyu wa Gatandatu kugeza kuri iki Cyumweru, mu Ishyirahamwe ry’umukino wa Volleyball hari gukinwa umunsi wa nyuma wa Shampiyona ya Volleyball, ni umunsi wa 8 waje ukurikiye indi minsi 7 yakinwe guhera mu Mwaka ushize w’i 2022.
N’ubwo itarakina umukino wa nyuma, Ikipe ya REG Volleyball Club yegukanye igikombe cya shampiyona ya Volleyball umwaka w’imikino 2022-23, itsinze APR VC amaseti 3-1 mu mukino wa 1/2.
REG VC yasabwaga kugera ku mukino wa nyuma kugira ngo yuzuze amanota ayemerera igikombe cya shampiyona, yabigezeho itsinze APR VC mu mukino wa 1/2 amaseti 3-1.
Iseti ya mbere yarangiye ari amanota 25 ya REG kuri 18 ya APR VC, iseti ya 2 APR VC iyegukana ku manota 17 ya REG kuri 25 ya APR VC, iseti ya gatatu REG yagarutse iyitsinda amanota 25 kuri 19, naho iseti ya nyuma REG iyitsinda amanota 25 kuri 18 ya APR VC umukino uhita urangira.
REG VC yarushaga inota rimwe ikipe ya Gisagara VC irimo gukina na IPRC Ngoma, bivuze ko n’iyo Gisagara VC yagera ku mukino wa nyuma igatsinda REG VC itakegukana igikombe kuko banganya amanota, hakarebwa ikipe yegukanye uduce twinshi, kandi REG VC niyo yihariye uduce twinshi twa shampiyona.
