Mu gihe mu Mezi abiri ari imbere Shampiyona zo ku Mugabane w’Uburayi zishyirwaho akadomo, amakipe anyuranye akomeje kureshya abakinyi ngo bazayakinire mu Mwaka utaha w’imikino, mu gihe abandi bifuza kwerekeza mu makipe mashya aho bazabona umwanya wo gukina.
Buri uko Umwaka utashye, Isoko ryo mu Mpeshyi ni rimwe mu riba rihanzwe amaso, kuko amakipe y’Ibigugu arityo yifashisha yiyubaka.
Muri iyi Nkuru, THEUPDATE yifashishije Ibinyamakuru binyuranye, ikusanya amwe mu makuru avugwa kuri iri Soko ryatangiye gushyuha imburagihe.
Newcastle United yatangaje ko iri mu biganiro bigamije kugarura Raphinha mu Bwongereza.
Raphinha w’imyaka 27 y’amavuko, yavuye muri iyi Shampiyona mu Mpeshyi ishize yerekeza muri FC Barcelona akuwe mu ikipe ya Leeds United.
Uretse uyu mukinnyi, Ikinyamakuru The Mirror cyatangaje ko iyi kipe yifuza kugura Abanyaturukiya Arda Guler w’imyaka 18 na Ferdi Kadioglu w’imyaka 23, ibakuye muri Fenerbahce.
Giovani lo Celso w’imyaka 27 arifuzwa na Aston Villa.
Uyu Munya-Argentine ukinira Villarreal ku ntizanyo ya Tottenham, arifuza n’Umutoza Unai Emery wanamutoje muri Villarreal nk’uko Ikinyamakuru Daily Mail kibitangaza.
Uretse Giovani, Aston Villa ihanganiye na Brighton Umunyaportugal ukina hagati mu Kibuga, Andre Almeida w’imyaka 22 ukinira Valencia mu kiciro cya mbere muri Esipanye, nk’uko iki Kinyamakuru gikomeza kibivuga.
Newcastle United na Borussia Dortmund, zihanganiye Umuholandi, Crysencio Summerville w’imyaka 21 ukina muri Leeds United nk’uko Ikinyamakuru Football Insider kibitangaza.
Umunyaportugal Diego Moreira w’imyaka 18 ukina muri Benfica, igihe icyo aricyo cyose ashobora kwerekeza muri Chelsea yo mu Bwongereza nk’uko Ikinyamakuru 90min kibitangaza.
Mu mpera z’Icyumweru gishize, abashinzwe gushakira abakinnyi amakipe ya Newcastle United na Manchester United, bagiye gucungira hafi Umunyasloveniya, Benjamin Sesko w’imyaka 19 ukinira Red Bull Salzburg yo muri Autriche, nk’uko Ikinyamakuru 90min kibitangaza.
Liverpool, Chelsea na Manchester City zaihanganiye Umunyacroatiya w’Imyaka 16, Luka Vuskovic ukinira Hajduk Split yo muri Croatia, nk’uko Ikinyamakuru Daily Mail kibivuga.
Arsenal yo mu Bwongereza yatangaje ko itarakura amaso ku Munyaportugal, Pedro Neto w’imyaka 23 ukinira Wolves nk’uko Ikinyamakuru TeamTalk kibivuga.
Ni mu gihe kandi, ikipe ya FC Barcelona yatangaje ko iri gukurikiranira hafi Ng’olo Kante wa Chelsea, Manchester United itari gukura ijisho kuri Neymar wa Paris Saint Germain, ari nako kandi FC Barcelona na Lionel Messi bashobora kongera gusubirana muri iyi Mpeshyi.