Colonel Désire Uwamahoro wari usanzwe ayobora umutwe wa polisi ushinzwe kurwanya imyigaragambyo( BAE) muri iki gihugu yakuwe mu nshingano ze.
Nyuma yo gukurwa muri izi nshingano, yasimbuwe na Koloneri Sindayiheba Jonathan, uyobora inzego za Polisi (API).
Icyemezo cyo gusimbura Koloneri Uwamahoro, cyafashwe ejo hashize n’Ubuyobozi bwa Miniteri y’Umutekano.
Uwamahoro yakuwe kuri uyu mwanya nyuma yo gufungirwa muri Gereza nkuru ya Murembwe mu Ntara ya Rumongi, guhera tariki 21 z’uku kwezi.
Bivugwa ko akungiwe Dosiye ifitanye isano na Alain Guillaume Bunyoni wigeze kuba Minisitiri w’Intebe w’iki gihugu.
Amakuru amwerekeye kandi akaba avuga ko yaba yarabangamiye umugambi wo kwaka General Alain Guillaume Bunyoni abamucungira Umutekano n’abamurindira iwe mu Rugo, ubwo yamburwaga ububasha bwo kuba Minisitiri w’Intebe.
Kuri ubu, Ubugenzacyaha bw’u Burundi ntabwo butaratangaza ku mugaragaro icyo Colonel Uwamahoro akurikiranyweho.
Ku wa Gatatu w’Icyumweru gishize, umuyobozi w’Umutekano mu Burundi, yabajijwe n’itangazamakuru icyo Colonel Uwamahoro afungiwe, araruca ararumura.
Nk’uko amategeko y’Umutekano mu Burundi abiteganya, mu gihe Colonel Uwamahoro Désire yaba ahamwe n’Icyaha icyo aricyo cyose cyatuma afungwa Amezi Standatu, byamuviramo kwirukanwa ku kazi yakoraga ko kuba Umupolisi muri iki gihugu.
Colonel Uwamahoro yatorewe kuyobora urwego rwa Polisi rushinzwe kurwanya Imyigaragambyo (BAE ) mu 2015, mu 2016 aza gushinjwa gukora Ubucuruzi bw’Amabuye y’Agaciro butemewe mu Burundi.
Yafunzwe igihe gito, nyuma ararekurwa asubira mu nshingano.
Urwego rushinzwe kurwanya Imyigaragambyo ‘BAE’ mu Burundi rwashinzwe mu 2015 ubwo Nyakwigendera Pierre Nkurunziza yiyamamarizaga kongera kuyobora Uburundi muri Manda yatabarutse itarangiye.