Ikipe y’Ingabo z’Igihugu y’umukino wa Basketball, APR Basketball Club yatangaje ko yasinyije Umunyamerika Mazen Trakh wabaye umutoza wungirije mu ikipe ya Detroit Pistons ikipe Shampiyona izwi nka NBA (National Basketball Association), ngo ayibere umutoza wayo mukuru.
Mazen Trakh w’Imyaka 60 y’Amavuko, yasimbuye Umunyakenya Cliff Owuor wayitozaga. Gusa, Cliff azakomeza ari Umutoza wungirije w’iyi kipe.
Hagati y’Umwaka w’i 2010 na 2014, Mazen Trakh yabaye umutoza wungirije mu ikipe ya Oklahoma City Thunder na Detroit Pistons.
Atoza muri Detroit Pistons, yakoranye na Maurice Cheeks Umunyamerika kabuhariwe mu gutoza Basketball uyu akaba yaranakiniye ndetse anatoza ikipe ya Chicago Bulls.
Hagati y’Umwaka w’imikino w’i 2015-2016, Mazen Trakh yari mu itsinda ry’abatoza b’ikipe ya Golden State Warriors.
Nyuma, hagati y’Umwaka w’i 2016-2017, yahise yerekeza mu itsinda ry’abatoza b’ikipe ya Washington Wizards.
Uretse kuba yaranyuze muri NBA (National Basketball Association) nk’umutoza, yanatoje muri Continental Basketball Association (CBA) na American Basketball Association (ABA).
Yafashije ikipe ya Fastlink yo muri Jorudaniya kwegukana irushanwa rya FIBA Asia Club Championship mu Mwaka w’i 2006.
Icyo gihe, iyi kipe yahise inaca agahigo ko kuba ikipe ya mbere yo muri iki gihugu yegukanye iri rushanwa.
Mazen Trakh asanze APR BBC ku mwanya wa 10 ku rutonde rw’agateganyo rwa Shampiyona y’u Rwanda, izwi nka Rwanda Basketball League.
