Kuri iki Cyumweru, mu gihugu cya Misiri haraye hasojwe imikino yo gushakisha Itike yo kuzakina imikino ya nyuma ya BAL 2023 izabera i Kigali guhera tariki 20 Gicurasi kugeza ku ya 27 Gicurasi 2023.
Iyi mikino yo mu Itsinda ryiswe Nile Conference, yasize Ikipe ya Al Ahly yo mu Misiri isoreje ku mwanya wa kabiri nyuma yo gutsindwa na Petro de Luanda amanota 91-90.
Nyuma yo gusoreza ku mwanya wa kabiri, byahise bishyira mu mazi abira REG BBC izaba ihagarariye u Rwanda muri iyi mikino, kuko izacakirana n’iyi Kipe yegukanye Shampiyona ya Misiri, mu mikino yo gukuranwamo ya 1/4, aho Amakipe yombi akina umukino umwe gusa.
REG BBC yasoreje ku mwanya wa 3 mu mikino y’amakipe yari mu Itsinda ryiswe Sahara Conference, iri rikaba ryarakinnye imikino yaryo muri Werurwe 2023, mu mikino yakiniwe muri Dakar Arena mu gihugu cya Senegal.
Ku nshuro ya mbere ubwo iyi mikino yakinwaga mu Rwanda mu 2021, Ikipe ya Patriots BBC yari ihagarariye u Rwanda, yasoreje ku mwanya wa Kane, mu gihe ku nshuro ya kabiri mu 2022, REG BBC yari yaserukiye Igihugu, yakubitiwe ahareba inzega, kuko yasezerewe itarenze umutaru, nyuma yo gutsindwa n’Ikipe ya Police yo muri Kameroni (FAP).
Ubwo iyi mikino ya Basketball Africa League (BAL) yakinwaga ku Nshuro ya 1, Igikombe cyegukanywe na Zamalek yo mu Misiri, mu gihe ku Nshuro ya 2 cyatwawe na US Monastir yo mu gihugu cya Tunisia.
