Nyuma y’uko mu Kwezi kwa Kamena (6) na Nzeri (9) hakinwe imikino y’iteramakofe izwi nka ‘Universe Boxing Champion’ itegurwa ku bufatanye na Sports Genix International (SGI), abahize abandi bagiye guhatanira Umukanda mpuzamahanga.
Abakinnyi bitwaye neza mu kiciro cy’abagore n’abagabo, bazahura n’abanyamahanga bakomoka muri Uganda na Suwede tariki ya 08 Ukuboza 2024, barwanire umukanda w’abaremereye bari mu kiciro kibanziriza abaremereye cyane.
Iyi mikino ikinirwa muri Kigali Universe.
Iki kiciro bazaba bahanganyemo, nicyo kibanzira icy’abaremereye cyane nk’uko bigaragara ku rubuga rwa WABA (World Alliance Boxing Association).
Ku ikubitiro, mu Kwezi kwa Kamena (6) hari hatsinze abakinnyi 20, mu gihe muri Nzeri hasigayemo 10 gusa, ari nabo bakatishije itike yo kugera ku mikino ya nyuma.
Imirwamo izaba ihanzwe amaso, irimo uzahuza Umunyarwandakazi Nsengiyuma Ange uzaba uhanganye n’Umunyasuwedekazi, Sanda Attermo. Bazahangana mu kiciro cy’abafite ibiro biri hejuru ya 50.
Muri iki kiciro cy’abagore, bombi bazaba bahatanira umukandara watanzwe na WABA (World Alliance Boxing Association)
Uretse mu kiciro cy’abagore, mu bagabo bizaba ari ibicika. Umunyarwanda, Nsengiyumva Vincent, azaba ahanganye n’Umugande, Manguso Vicent.
Aba bakinnyi kabuhariwe mu mukino w’iteramakofe, bazaba bahanganye mu bakinnyi bari hejuru y’ibiro 80.
Nk’uko bizaba bimeze mu kiciro cy’abagore, no muri iki kiciro cy’abagabo, bazaba bahatanira Umukandara watanzwe na WABA (World Alliance Boxing Association).
Mu byiciro byombi, kwegukana intsinzi (Umukandara), bizasaba guhigika uwo bazaba bahanganye, mu duce (Round) dutandatu (6).
N’ubwo hazaba hari abahanganiye Umukandara w’icyubahiro, Sports Genix International na Kigali Universe bateganyije indi mirwano izatanga amanota n’ibihembo bitandukanye. Abazaba bahanganye nabo bazakina Uduce (Round) dutandatu (6).
Uko indi mirwamo iteganyijwe
- Kassa Hans (Rw) vs Musa Ntege (Ug)
- Hagenimana Aimable (Rw) vs Joshina Lumunya (Ug)
- Niyonzima Pacifique (Rw) vs Matthias Maciano (Ug)
- Murenzi Hassani (Rw) vs Abubakar Amin (Ug)
- Ndayishimiye Patrick (Rw) vs Henry Kasozi (Ug).
Akomoza kuri iyi mikino, Umuyobozi mukuru wa Sport Genix International (SGI), Rurangayire Guy Didier yatangarije THEUPDATE ko iterwa imenyekanishwa Universal Boxing Champion (UBC), igaterwa inkunga na Kigali Universe ku bufatanye na Sports Genix International (SGI).
Yaboneyeho kukangurira abakunzi b’umukino w’iteramakofe kutazacikanwa n’iyi mikino, cyane ko ibiciro byo kuyikurikirana bidakanganye ugereranyije n’urwego iriho, ndetse n’uko ku rwego mpuzamahanga biba bihagaze.
Amafoto
