Ku wa Gatandatu tariki ya 23 Ugushyingo 2024, kuri Sitade Amahoro i Remera mu Mujyi wa Kigali, hazakinirwa Shampiyona y’imikino ngororamubiri ku rwefo rw’Igihugu.
Iyi Shampiyona igarutse kuri Sitade nkuru y’Igihugu nyuma y’Imyaka isaga 2 n’igice, kuko yaherukaga kuhakinirwa mu 2022 mbere y’uko itangira kuvugururwa, igashyirwa ku rwego mpuzamahanga.
Amakuru THEUPDATE ifite, iyi Shampiyona izatangira ku isaha ya saa moya n’igice z’igitondo, isozwe saa cumi n’imwe z’umugoroba ntagihindutse.
Izitabirwa n’abakinnyi bakuru n’abato mu byiciro by’abagabo n’abagore. Aba bakinnyi n’abagize amakipe yose abarizwa mu Ishyirahamwe ry’imikino ngororamubiri mu Rwanda.
Ku ikubitiro, abakinnyi bazatangira barushanwa muri Metero 5000, mu gihe irushanwa rizasozwa basiganwa 4x100m.
Muri rusange, Mu kurushanwa kwiruka, abakinnyi bazasiganwa intera ya metero 100, 200, 400, 800, 1500, 3000 5000 na metero 10,000.
Mu yindi mikino izakinwa, harimo; Long Jump (Umurambararo), Triple Jump (Gusimbuka inshuro 3), Shot Put (Gutera intosho), Discuss (Gutera ingasire) na Javelin (Gutera umuhunda).
Iyi Shampiyona y’igihugu izwi nka ‘Truck and Field Championship’, igamije gusuzuma ubushobozi bw’abakinnyi, kureba uko uyu umwaka w’imikino uri kugana ku musozo urangiye bahagaze ndetse no kubongerera ubunararibonye mu rwego rwo kwitegura kuzahagararira u Rwanda mu marushanwa mpuzamahanga ateganyijwe mu minsi iri imbere.
Amafoto
